लभ गर्ने कोही भए भ्याकेन्सी छ ः सालु गौतम

लन्डन । लोकप्रिय हांस्यकलाकार सिताराम कट्टेल अर्थात धुर्मुस्ले निर्देशन गरेको गायक प्रमोद खरेलको गीत ‘मनै कन्ट्रोलै हुदैन्…’ मा मोडलिङ गरेपछि धेरैले मोडलका रुपमा चिने सालु गौतमलाई । सिंगापुर, लन्डन हुंदै पोर्चुगल पुग्दा आठ वर्षमा आफ्नो परिचय बेली डान्सर र नेल आर्टिष्टका रुपमा बनाएकी उनी केही महिना अघि नेपाल फर्केर एकाएक मोडलको अवतारमा झुल्किइन् । धेरैतिर उनका तस्विर छापिए । तर, उनी अब यत्तिमै सिमित नहुने भएकी छिन् । आफ्नै शव्द र संगीतमा उनको पहिलो गीति एल्बम ‘दिपशिला’ बजारमा आउने अन्तिम तयारीमा छ । फाष्ट, आधुनिक र रोमाण्टिक खालका ६ गीत समावेश गरेर उनले पहिलो संग्रह ल्याउन लागेकी हुन् । ‘मैले संगीतप्रतिको झुकाव कसैलाई भनेकै थिइन’, सालुले वीनेपालीसंग भनिन्, ‘नेपाल आउने वित्तिकै तीनमहिना संगीत सिकेर एल्बम ल्याउन लागेको कुरा गर्दा त सबै आश्चर्यचकित छन् ।’

एल्बमको ‘लौ हेर म नाच्छु कसरी…’ गीतको म्यूजिक भिडियो रिलिज नहुंदै हिट भइसकेको छ । त्यसमा सालु आफैं, रविना र सवनमको हट डान्सले दर्शक तान्न शुरु गरिसकेको छ ।

पर्यटन सम्वन्धि सानो व्यापार गर्ने तयारी समेत गरिरहेकी सालुले नेपालमा काम गर्न अप्ठेरो भएको बताइन् । ‘नकारात्मक सोच भएका र खुट्टा तान्नेमात्र भेटिरहेकी छु’, उनको दृढता चाहिं छ, ‘तर आंटेको काम त पुरा नगरि छोड्दिन ।’ व्यापार र संगीत संगै लाने सोच उनको छ । तनहुंकी यी सुन्दरीले फिल्म समेत निर्माण गर्ने महत्वकांक्षा सांचेकी छिन् ।

सालुलाई नेपाली समाज खुल्ला हुदै गएपनि मान्छे चाहिं कन्जरभेटिभ खालका रहेको अनुभव भएको छ । भन्छिन्, ‘आफ्नो इच्छा अनुसार लगाउंदा, खांदा बस्दा पनि के भन्ने हुन् जस्तो छ नेपाली समाज ।’

प्रेमी विहीन छन् रे उनी । ‘राम्रो केटा खोजी रहेको छु, भ्याकेन्सी खाली छ है’, उनी जिस्किंदै थिइन्, ‘बिहे गरौं भनेको पनि केटा पाइएन ।’ उनलाई यौनबारे कुरा गर्न उस्तो संकोच लाग्दैन । कारण, पश्चिमा संस्कृतिमा हेलमेल भइन् उनी ।
‘सेक्स नर्मल चीज हो यदि विश्वासिलो मान्छे छ भने’, उनी खुलिन्, ‘तर, को संग कसरी हुंदैछ र त्यसको प्रभाव भविष्यमा कस्तो रहन्छ ख्याल त हुनैपर्छ ।’

लामो समय विदेश बसेर सुःख दुःख भोगेकी सालुले आफ्नो सहित नेपाली महिलाका दुःख पीडा समेटेर छिट्टै पुस्तक समेत निकाल्ने बताएकी छिन् ।