लोकप्रिय कलाकारद्वय इन्दिरा र बलवीरलाई क्यान्सर, उपचारमा सहयोग गर्न आग्रह

काठमाडौं । लोकप्रिय कलाकारहरु इन्दिरा गोले र बलवीर थापा प्राणघातक क्यान्सर (अर्बुद) रोगका कारण बिरामी पर्नुभएको छ ।

लोक तथा दोहोरी गीतका स्थापित कलाकार ललितपुर भारदेउकी इन्दिरालाई पेटको भागमा क्यान्सर र तनहुँ भानु नगरपालिकाका बलवीरलाई रक्त क्यान्सर भएको हो । नेपाल तामाङ कलाकार संघका पूर्वअध्यक्षसमेत रहनुभएकी गायिका गोले विगत दुई वर्षदेखि क्यान्सर रोगको उपचार गर्दै आउनुभएको छ । ५८ वर्षीया गोले हाल नेपाल क्यान्सर अस्पताल हरिसिद्धि ललितपुरमा उपचाररत हुनुहुन्छ ।

आफ्नो आर्थिक स्रोतले भ्याएसम्म उपचार गराउँदै आउनुभएकी गोलेको उपचारमा अब ठूलो रकम लाग्ने जनाउँदै नेपाल कलाकर संघले देश, विदेशमा रहेका नेपालीहरुमा सहयोगको अपिल गरेको छ । महासचिव खेम मोक्तानले शनिबार विज्ञप्ति जारी गर्नुहुँदै ‘गायिका इन्दिरा गोले बचाउ अभियान’ सुरु गरिएको जानकारी दिनुभएको छ । अभियानको नेतृत्वमा कलाकार संघ रहेको छ भने म्हेन्दोला फोले फाउन्डेशन र तामाङ डाजाङ संयोजन सदस्य रहेका छन् ।

यस्तै गायक थापाले मेडिकल जाँच गर्दा ब्लड क्यान्सर देखिएकोले चिकित्सकको सल्लाहबमोजिम तत्काल सघन उपचार गराउनुपर्ने र उपचार खर्च अत्यन्तै महँगो पर्ने भएकोले सहयोग गरिदिन अनुरोध गर्नुभएको छ ।