बेलायतमा गोर्खा पिस फाउन्डेशनले आगामी जुन ७ मा ‘गोर्खा वाक’ आयोजना गर्ने

लन्डन र आशफोर्डमा कार्यालयहरु रहेको ए स्टार मोर्गेजेज पदयात्राको प्रमुख प्रायोजकको रुपमा रहेको छ।

लन्डन । गोर्खा पिस फाउन्डेशनले आगामी ७ जुन २०२६ मा बेलायतको आशफोर्डस्थित ग्रेट चार्ट प्लेइङ्ग फिल्ड्समा गोर्खा वाक (गोर्खा पदयात्रा) आयोजना गर्ने भएको छ ।

वीरता र साहसको सम्मान गर्दै ब्रिटिश सेनाको सर्वोच्च पदक ‘भिक्टोरिया क्रस’ प्राप्त १३ जना भूतपूर्व गोर्खा सैनिकहरुको सम्झनामा पदयात्रा आयोजना गर्दै आएको फाउन्डेशनका संस्थापक अध्यक्ष भिम तुम्वाहाम्फेले बताउनुभएको छ । उहाँका अनुसार १३ औं वार्षिक गोर्खा वाकमा यो वर्ष झन्डै २,००० जनाको सहभागिता हुने अपेक्षा गरिएको छ ।

‘हाम्रा नानी छोराछोरीले इतिहास बिर्सदै गए। त्यसैले इतिहासलाई जीवित राख्नु पर्छ भन्ने हिसाबले गोर्खा वाक गर्दै आएका छौं । यसबाट मानसिक र शारीरिक स्वास्थ्य लाभ त हुने नै भयो, यो कार्यक्रमबाट बेलायतमा बसोबास गरिरहेका नेपाली समुदाय र अन्य समुदायबीच समझदारी र सहकार्यमा मदत पुग्ने हाम्रो अपेक्षा छ,’ उहाँले भन्नुभयो ।

अध्यक्ष तुम्वाहाम्फेका अनुसार पदयात्राको लागि २ वटा रुट तय गरिएको छ। पहिलो रुट साढे ६ किलोमिटर लामो हुनेछ भने दोस्रो रुट १३ किमि । ‘हामीले एक भीसी बराबर एक किलोमिटर राखेका हौँ,’ उहाँले भन्नुभयो ।

बेलायतमा बसोबास गरिरहेका भूतपूर्व गोर्खा सैनिक तथा तिनका परिवारलाई मद्दत गर्ने उद्देश्यले सन् २०१३ मा स्थापना गरिएको गोर्खा पिस फाउन्डेशनले अहिले बर्सेनि नेपालका १६/१७ वटा स्कुलहरुलाई सहयोग गर्दै आएको छ । ‘हामीले नेपालमा विद्यालय भवन निर्माण, खानेपानी तथा शिक्षकको तलबमा पनि सहयोग गर्दै आएको छौं । साथै, बेलायतमा आफ्नै जग्गा किनेर बहुउद्देश्यीय सभा कक्षसहितको आफ्नै भवन बनाउने पनि हाम्रो योजना छ,’ अध्यक्ष तुम्वाहाम्फेले भन्नुभयो ।

गोर्खा वाकका विजेताका लागि रनिङ्ग शिल्डलगायत अन्य पुरस्कारको पनि व्यवस्था गरिएको छ। लन्डन र आशफोर्डमा कार्यालयहरु रहेको ए स्टार मोर्गेजेज उक्त पदयात्राको प्रमुख प्रायोजकको रुपमा रहेको छ।

‘गोर्खा पिस फाउन्डेसनले आयोजना गर्ने गोर्खा वाक २०२६ कार्यक्रममा ए स्टार मोर्गेजेज पनि सहयात्री बन्न पाएकोमा हामी गर्व महसुस गरिरहेका छौँ । यस कार्यक्रममा तपाईँहरू सबैको उपस्थितिले यसलाई परिष्कृत र थप उचाइमा लैजाने छ भन्ने हामीहरूलाई लागेको छ,’ ए स्टार फाइनान्सियल सलुशन्स तथा ए स्टार मोर्गेजेजका प्रबन्ध निर्देशक मिन दर्लामीले भन्नुभयो,’तसर्थ सम्पूर्ण नेपालीहरूलाई कार्यक्रममा उपस्थित भएर सहयोग गरिदिनु हुन हामी आह्वान गर्दछौँ ।’