लन्डन म्याराथन सम्पन्न, केन्याका सबास्टिन सावेले रचे नयाँ इतिहास

लन्डन । विश्वको एक उत्कृष्ट म्याराथनमध्ये एक लन्डन म्याराथन २६ अप्रिल २०२६ आइतबार सम्पन्न भएको छ । यस वर्षको म्याराथनमा सबास्टिन सावेले नयाँ इतिहास रचेका छन् । उनले लन्डन म्याराथन दुई घण्टाभन्दा कम समयमा दौडेका छन् । केन्याका सावेले उत्कृष्ट प्रदर्शनको नमुना पेस गर्ने क्रममा १ घण्टा ५९ मिनेट ३० सेकेन्डमा दौड पूरा गरेका हुन् ।

केजचा १ घण्टा ५९ मिनेट ४१ सेकेन्डमा दोस्रो भए । युगान्डाका ज्इकोब किपलोमो २ घण्टा २८ सेकेन्डमा तेस्रो भए ।

महिलातर्फ टिग्स्ट आसेफाले पनि नयाँ विश्व कीर्तिमान बनाएकी छन् । ओलम्पिक च्याम्पियन तथा वर्ल्ड च्याम्पियनसिपमा रजत पदक विजेता आसेफाले २ घण्टा १५ मिनेट ४१ सेकेन्डमा दौड पूरा गरिन् ।

यस्तै बेलायतमा नेपालीहरुको संख्या बाक्लै रहेकाले निरन्तर रुपमा लन्डन म्याराथनमा सहभागिता जनाइरहेका छन् । नेपाल रन क्लबबाट ५० जनाभन्दा बढी धावकले यस पटक लन्डन म्याराथनमा भाग लिएका छन् । नेपाल रनका संयोजक सन्तोष राईकै समन्वयमा जर्मनी, बेल्जियम, अष्ट्रेलिया, अष्ट्रिया, यूनाइटेड अरब इमिरेट्स, सर्बिया, सिंगापुर, यूके, अमेरिका र नेपालसहित १० देशका धावकले नेपाल रनमार्फत सहभागिता जनाएका छन् ।

धावकहरुले संकलन गरेको च्यारिटी रकम नेपालको हाई अल्टिच्युट ट्रेनिङ सेन्टर जुम्लामा खर्च हुने नेपाल रनका संयोजक राईले बताएका छन् । लन्डन म्याराथनमा हजारौंले सहभागिता जनाउने गर्छन् । लन्डन म्याराथनमा यस वर्ष ५९ हजार बढी धावकले २६.२ माइल (४२.२ किमि) लामो दौड पूरा गरे ।