न्यूयोर्कमा निलिमा स्टाइल

लन्डन । जमाना फेशनको छ । नेपालका तन्नेरीहरु समेत अब समयानुकुल फेशन 
स्टाइलमा बेखवर रहेनन् । फेशन डिजाइनिङमा डेढ दशक बढि समय बिताइसकेकी फेशन स्टाइलिष्ट एवं डिजाइनर निलिमा शर्माको लामो अनुभवले भन्छ, ‘नेपालमा पनि नयां नयां फेशन अपनाउने प्रचलन बढेको छ । तर, अधिकांशमा अझै फेशन बुझ्ने चेतनास्तर कमीले यो क्षेत्र फष्टाउन बांकी छ ।’

यतिखेर न्यूयोर्कमा छन् निलिमा । उनको यसपटकको न्यूयोर्क घुमाइ केवल आफन्तजन भेटघाट र मनोरञ्जनमा मात्र सिमित छैन् । अमेरिकामा नेपालीहरुको जनसंख्या वृद्धि भइरहंदा निलिमाले आफ्नो क्रियटिभ फेशन स्टाइल अमेरिकावासी नेपालीमाझ समेत प्रबर्धन गर्न समय खर्चिरहेकी छिन् । ‘अमेरिकाका नेपालीलाई आफ्नो मौलिक नेपाली भेषभुषा उपलव्ध गराउनेबारे सम्भावनाको खोजी गरिरहेकी छु’, उनले न्यूयोर्कबाट भनिन् ।

वाल्यकालदेखिनै ड्रेसअपमा धेरै सौखिन थिइन् निलिमा । साथीभाइ, नेपाली 
संकुचित समाजले जे भनोस्, उनलाई वास्ता थिएन । कानमा ठूलठूला रिङ हुन्थे, आमाको सारी लगाएर यतायता डुल्थिन् उनी । अवोध वालिका हाइ हिलमा ठांटिएर हिंड्दा धेरैको नजर उनीमाथि पथ्र्यो । सानैदेखि आफूलाई सधैं पृथक स्टाइलमा उभ्याउन चाहने उनलाई सिनेमाको हिरोइन बन्ने भुत सवार भएको थियो वाल्यकालमा । तर, समयले उनलाई एक्सन कट होइन, भेषभुषामा रंग र बुट्टा 
भर्ने काम सिकाएको छ, अर्थात एक नामी फेशन स्टाइलिष्ट र डिजाइनर बनाएको छ ।

अहिले नेपालमा औंलामा गन्न सकिने फेशन स्टाइलिष्ट एवं डिजाइनरमध्ये उनको नाम अग्रपंक्तिमा छ । नमुना कलेज अफ फेशन टेक्नोलोजीकी ग्रयाजुएट उनको सन् २००९ मा सिटी सेन्टरमा स्थापित निलिमाज् फेशन स्टुडियो अहिले नयां बानेश्वरबाट चालु छ । चाहे सेलिब्रेटी हुन्, चाहे काठमाण्डौंका धनाढ्य । आधुनिक फेशनका पारखी निलिमाको कलात्मक डिजाइनबाट अत्यधिक प्रभावित छन् ।

‘विश्व बजारमा फेशनका नयां आयामलाई म नजिकबाट नियालिरहेको हुन्छु, पत्रपत्रिका पढ्छु र केही नयां कुरा सिक्न लालयित भइरहन्छु’, उनी सफलताको कारण प्रष्ट्याउंछिन् । फेशन दुनियांमा उनको परिकल्पना क्षितिज ज्यादै फराकिलो छ । यसप्रतिको उनको लगाव अब सजिलै मेटिने छैन् अर्थात उनी सकुन्जेल यही क्षेत्रमा लागिरहनेछिन् ।

निलिमाको पाइला नेपाली सिनेमातिर पनि बढेको छ । उनले हालसम्म के यो माया हो, वान वे, कवड्डी, टलक जंग भर्सेज टुल्के, देश खोज्दै जांदा, फेसबुक, भिजिलान्ते, आभास, बितेका पल लगायत फिल्मका लागि फेशन डिजाइनिङ गरिसकेकी छन् ।

निलिमाको क्रियशनको सही मुल्यांकन समेत भइरहेको छ । नेपाल चलचित्र प्राविधिक संघले वर्षेनी एक जना उत्कृष्ट कस्ट्युम डिजायनरलाई प्रदान गर्ने नेफ्टा अवार्ड २०१३ र २०१४ जितिन् उनले फिल्म के यो माया हो र बितेका पलका लागि । फिल्मी खबरले प्रदान गर्ने २०१४ सालको पपुलर कस्ट्युम डिजाइनरको अवार्ड पनि उनले ग्रहण गरिसकेकी छिन् । यस अलवा डि सिने अवार्ड अन्तर्गतको इन्करेज्मेन्ट अवार्ड २०१४ देखि सगरमाथा प्रतिष्ठानले प्रदान गर्ने कस्टयुम विद्याको नेपाल सम्मान समेत निलिमाको पोल्टामा परिसकेको छ । आफैं फेशन पढेको नमुना कलेजले समेत उनलाई हालै मेरिटोरिओस् अवार्ड प्रदान गरेको छ ।

अरु धेरैको फेशन डिजाइन गर्ने उनी आफू चाहिं कस्तो पहिरन मन पराउंछिन् ? उनकै शब्दमा, सारी र इभिनिङ गाउन, एक्सेसोरिज् र ज्वेलरी औधि मन पर्छ मलाई ।

सन् २०१० को टिजिफ फेशन विकमा निलिमाको अद्भूत सफलतालाई धेरैले तारिफ गरेका थिए । भर्सटायल निलिमा फेशन स्टाइलिष्ट र डिजाइनर मात्र होइनन्, उनलाई गायनमा पनि उत्तिकै सोख छ । देश विदेश घुम्नु उनको अर्को सौख हो जसले निलिमा आफूलाई धेरै क्रियटिभ हुन सघाएको बताउंछिन् ।