एकल गायनमा गुञ्जँदै शर्मिला र सितु

लन्डन । बेलायतमा रहेपनि विश्वभरका नेपालीमाझ परिचित गायिकाहरु सितु खरेल र शर्मिला बर्देवा एकल सांझको तयारीमा छन् ।
नेपाली सुगम संगीतकी स्थापित गायिका बर्देवाले दशैं तिहारको मौका छोपेर आगामी २१ र २८ सेप्टेम्बर सांझ एकल शुभकामना सांझ गर्न लागेकी हुन् । लन्डनस्थित ह्यारो बरो फुटबल क्लवमा पहिलो र फार्नबोरोस्थित श्यामुयल कोडी स्पोर्टस् हलमा अन्तिम कार्यक्रम तय भएका छन् ।
दुई दशकदेखि गायनमा समर्पित बर्देवाको यो पहिलो एकल कन्सर्ट हुनेछ । ‘कोकिल स्वरकी धनी तारा देवीको सम्झनामा उहांकै कालजयी गीतबाट दर्शकलाई मनोरञ्जन दिने सोच छ’, – उनले भनिन् । लाइभ अकेष्टाको प्रयोग गर्ने योजनामा रहेकी बर्देवालाई संगीतमा रियाज व्याण्ड र गायनमा सुजन पराजुलीले साथ दिनेछन् । कार्यक्रमको जिम्मा अंशु इन्टरटेनमेन्टले लिएको छ ।
बेलायतमा नर्सिङ्ग पेशामा आवद्ध बर्देवाका आंखैमा झलझली, मेरो हजुरलाई, फूलको जवाफ, तस्विरमै यस्तो, देब्रे आंखा, सर सर लगायत गीत हिट छन् । नेपाली चलचित्र र आधुनिक गरी करिब ६ सय गीतमा उनले स्वर दिइसकेकी छिन् ।

उता, फरक उद्देश्य लिएर सेप्टेम्बर ७ र ८ मा सितु सांझ गर्दैछिन् गायिका सितु खरेल ।

नेपालका अपाङ्गता भएका बालबालिकाको सहयोगार्थ ७ तारिख प्रिन्सेस हल, अल्डरसट र ८ मा ग्रीनफोर्ड टाउन हलमा हुने उक्त कन्सर्ट बिबिसी सञ्चारकर्मी सुमन खरेलले आयोजना गरेका हुन् ।

सन् २००४ मा लन्डनमा पहिलो कन्सर्ट गरेकी सितुको दशकपछि हुने यो कन्सर्टलाई विशेष रुपमा लिइएको छ ।
बिबिसी नेपाली सेवामा आवद्ध सञ्चारकर्मी सुमन खरेलको नामले होइन, आफ्नै खुबीले लोकप्रिय छिन् सितु । बेलायतमा रहेर झण्डै एक दशकदेखि नेपाली गीत संगीतमा पूर्ण समर्पित गायिका खरेलको स्मारिका, सिम्रिक, परी, निर्मन, सितु र बताससंगै गरि ६ एल्बम सार्वजनिक भइसकेका छन् ।
संगीत अध्ययनका लागि विश्वप्रसिद्ध लन्डनस्थित ट्रिनिटी कलेज अफ म्युजिकबाट सितुले गायनमा चार वर्षको बीम्यूज (अनर्स डिग्री) गरेकी छन् । त्यसअघि उनले लन्डनस्थित भारतीय विद्या भवनमा तीन वर्षको तालिम लिएर संगीतमा डिप्लोमा हासिल गरेकी थिइन् ।