युकेमा ७० वर्ष माथिकालाई कोरोनाको खोप लगाउन आह्वान

सरकारको खोप लगाउने प्राथमिकतामा रहेका चार समूहलाई फेब्रुअरीको १५ सम्ममा र ५० वर्ष माथिकालाई मे महिनासम्ममा खोप लगाउने नीति अनुसार अहिले ७० वर्ष माथिकालाई खोप लगाउन आउन सार्वजनिक अपील गरिएको हो ।

यसअघि मानिसहरुलाई खोपका बारेमा एनएचएसमा सम्पर्क नगर्न अनुरोध गरिएको थियो । तर अहिले भने ७० वर्ष माथिकालाई सम्पर्कमा आउन आह्वान गरएको छ ।

प्रमुख स्वास्थ्य अधिकृत क्रिस विट्टीका अनुसार यस उमेर समूहलाई किन पनि महत्वपूर्ण मानिएको छ भने कोरोना भाइरसको संक्रमणबाट निधन हुनेहरुमा ८३ प्रतिशत ७० वर्ष माथिका उमेर समूहका छन् ।

७० वर्ष वा सो भन्दा माथि उमेर पुगेकाहरुले एनएचएसको वेभसाइटमा गएर वा ११९ मा सित्तैमा फोन गरेर खोप लगाउने अपोइन्टमेन्ट लिन सक्नेछन् ।

ह्यानककले अहिलेसम्म खोप लगाउने दर सरकारले सोचेभन्दा राम्रो भएको बताएका छन् । बेलायतमा सोमबारसम्ममा १ करोड २२ लाख ९४ हजार ६ जनाले कोरोना खोपको पहिलो डोज लगाइसकेका छन् । ह्यानकका अनुसार ८० वर्ष माथिका उमेर समूहका करिब ९१ प्रतिशतले खोप लगाएको र ७५ देखि ७९ वर्ष उमेर समूहका ९५ प्रतिशतले खोप लगाएका छन् । उता केयर होममा बसोबास गर्ने ९३ प्रतिशतले पनि कोरोनाको खोप लगाएका छन् ।