बेलायतमा ठूलो संख्यामा कोरोनाविरुद्धको खोप दिन शुरु

लण्डनको एक्सेल खोप केन्द्र जहाँबाट हजारौँलाई खोप दिइँदैछ

लण्डन । बेलायतमा आजदेखि ठूलो संख्यामा कोरोनाविरुद्ध खोप दिन शुरु गरिएको छ ।

सरकारले देशका विभिन्न सात स्थानबाट वृद्धवृद्धा तथा स्वास्थ्य सेवा क्षेत्रमा कार्यरत मानिसहरुलाई सो खोप दिन शुरु गरेको हो ।

आजदेखि लण्डन, ब्रिस्टोल, सरे, न्युक्यासल,म्यानचेष्टर, स्टेभेनेज र बर्मिङहाममा एकै स्थानबाट ठूलो संख्यामा खोप दिन शुरु गरिएको छ । ती सेन्टरहरुमा एक मिनेटमा चार जनालाई खोप दिने क्षमता रहेको बताइएको छ ।

सरकारले ठूलो संख्यामा खोप दिन आगामी साता थप केन्द्रहरु खोल्ने बताएको छ ।

सरकारले अहिलेको लकडाउन (फेब्रुअरी दोस्रो सातासम्म)को अवधिमै खोप पाउनुपर्ने प्राथमिकताको उच्च चार समूहमा रहेका करिब १ करोड ३० लाख मानिसहरुलाई कोरोनाको खोप दिने लक्ष्य राखेको छ । यसैगरी आगामी सेप्टेम्बरभित्रमा सबै मानिसहरुलाई खोप दिइसक्ने सरकारको योजना रहेको स्वास्थ्य मन्त्री म्याट ह्यानककले आइतबार बताएका छन् ।

बेलायतका करिब १ हजार २०० जीपी, अस्पतालबाट यसअघि नै खोप दिइँदै आएकोमा अब फार्मेसीबाट पनि खोप दिन शुरु गरिँदै छ ।

बेलायतका खोप मन्त्री नदिम जाहावीले अहिले दैनिक २ लाख मानिसहरुलाई खोप दिन शुरु गरिएको बताएका छन् ।

हालसम्म युकेको कुल जनसंख्याको २.४ प्रतिशतले मात्र खोपको पहिलो मात्रा पाएको तथ्यांकले देखाएको छ जबकि बेलायतभन्दा पछि खोप दिन शुरु गरेको इजरायलले करिब १५ प्रतिशत जनसंख्यालाई खोप दिएको दाबी गरेको छ ।

बेलायतमा कोरोना भाइरसका कारण ८१ हजार मानिसको ज्यान गइसकेको छ ।