बीसीसी युके लन्डनको हाउजिङ परियोजनालाई आर्थिक सहयोग गर्न ‘सुपर मोङ्क’ चलचित्र प्रदर्शन हुँदै

लन्डन । बौद्ध भिक्षुको जीवनीमा आधारित धार्मिक चलचित्र ‘सुपर मोङ्क’ आउँदो बिहीबार १७ जुलाई का दिन अल्डरसटस्थित एम्पायर हलमा प्रदर्शन गरिने भएको छ ।

बुद्धिस्ट कम्युनिटी सेन्टर (बीसीसी) युके लन्डन शाखाको हाउजिङ परियोजनालाई आर्थिक सहयोग गर्ने उद्देश्यले यो प्रदर्शन गर्न लागिएको हो । उक्त चलचित्रसँगै “एयर अफ द बर्ड” समेतको प्रदर्शन गरिनेछ।

गत एक वर्षदेखि बीसीसी युकेको अल्डरसटस्थित गुम्बामा प्रमुख लामाको रूपमा कार्यरत खेन्पो सेनाङ ग्याम्जो द्वारा निर्देशन गरिएको दुवै छोटो चलचित्र बौद्ध धर्मगुरुहरूको जीवनकथामा आधारित छन् ।

सानो उमेरदेखि बौद्ध गुम्बामा रहेर विभिन्न चरणहरू पार गर्दै कसरी ‘सुपर मोङ्क’ बन्दछ भन्ने विषयलाई कथामा समेटिएको छ ।

नेपालका अत्यन्तै दुर्गम क्षेत्रमा छायांकन गरिएको चलचित्रले नेपाली चलचित्रको प्रतिनिधित्व गर्दै थुप्रै अन्तर्राष्ट्रिय चलचित्र महोत्सवमा भाग लिई विभिन्न पुरस्कारहरू प्राप्त गरिसकेको निर्देशक ग्याम्जोले जानकारी दिनुभयो ।

गत दुई हप्ता अघि लन्डनमै प्रदर्शन गरिएको सो चलचित्र नेपाली समुदायलाई लक्षित गर्दै अब अल्डरसटमा पुनः प्रदर्शन गरिन लागेको हो ।