बेलायतमा २४ औं गोर्खा कपको उपाधि राङभाङ समाज यूकेले जित्यो

लन्डन । बेलायतमा सम्पन्न २४ औं गोर्खा कप फुटबल प्रतियोगिताको उपाधि राङभाङ समाज यूके एफसीले जितेको छ ।

तमु धीं यूकेको आयोजनामा अल्डरसटस्थित क्वीन्स एभिन्यू स्पोर्ट्स ग्राउन्डमा आइतबार सम्पन्न फाइनल खेलमा राङभाङ समाज यूके एफसीले गुरुजी इलिट एफसीलाई २–० गोल अन्तरले पराजित गर्दै उपाधि उचालेको हो । विजेता टोलीले ३ हजार ५०० पाउन्ड तथा उपविजेता टोलीले २ हजार पाउन्डसहित ट्रफी प्राप्त गरे ।

राङभाङ समाज यूके एफसीका सम थापा ‘बेस्ट म्यानेजर’ घोषित हुनुभयो भने नेप्जोम एफसीका इन्योला अलमो ‘टप स्कोरर’ बन्नुभयो । राङभाङ समाज यूके एफसीकै नवाङ शेर्पा ‘प्लेयर अफ द म्याच’ घोषित हुनुभयो ।

भेट्रानतर्फ एफसी जिरो फोर विजेता तथा प्लमस्टेड एफसी उपविजेता बने । विजेता टोलीले १ हजार ८०० पाउन्ड र उपविजेता टोलीले १ हजार २०० पाउन्डसहित ट्रफी प्राप्त गरे । भेट्रानतर्फ शोम थापा ‘बेस्ट म्यानेजर’, निशान्त गुरुङ ‘टप स्कोरर’ तथा शेरजङ गुरुङ ‘प्लेयर अफ द म्याच’ घोषित हुनुभयो ।

महिलातर्फ तामाङ समाज यूकेको टोलीले उपाधि जित्दा रन्डरबोल्ट उपविजेतामा सीमित बन्यो । विजेता टोलीले ६०० पाउन्ड तथा उपविजेता टोलीले ४०० पाउन्डसहित ट्रफी प्राप्त गरे । महिलातर्फ शुक तामाङ ‘प्लेयर अफ द म्याच’ घोषित हुनुभयो ।

९–ए–साइड ढाँचामा सम्पन्न प्रतियोगितामा मुख्यतर्फ ३९ टोली, भेट्रानतर्फ १६ टोली र महिलातर्फ २ टोली गरी कुल ५७ टोलीको सहभागिता रहेको थियो ।

कार्यक्रमकै अवसरमा तमु धीं यूकेले रसमोर बरो काउन्सिललाई ५०० पाउन्ड तथा गोर्खा वेलफेयर ट्रस्टलाई ५०० पाउन्ड सहयोग हस्तान्तरण गरेको थियो ।

तमु धीं यूकेका अध्यक्ष जुमकाजी गुरुङको अध्यक्षतामा सम्पन्न कार्यक्रममा रसमोर बरो काउन्सिलका मेयर काउन्सिलर कालम स्टीवार्ट प्रमुख अतिथिको रुपमा उपस्थित हुनुहुन्थ्यो । गोर्खा कप संयोजक क्याप्टेन दीपक घले रहनुभएको थियो ।

प्रतियोगितामा नेपाली दूवावास लन्डन, बेलायतमा सक्रिय नेपाली संघ संस्थाका अध्यक्ष, प्रतिनिधि, समाजसेवी, बुद्धिजीवी, नेपालबाट आएका कलाकारलगयात हजारौं दर्शकको उपस्थिति रहेको थियो । कार्यक्रममा नेपाली सांस्कृतिक नृत्यसमेत प्रस्तुत गरिएको थियो ।