बेलायतमा १४ जुनमा १७औं नेपाली ओपन कन्सर्ट

लन्डन । मगर संघ युकेले हरेक वर्ष गर्दै आइरहेको नेपाली ओपन कन्सर्ट यस वर्ष १४ जुन २०२५ मा हुने भएको छ ।

फानबोरोको रग्बी क्लबमा १४ जुनमा १७औं नेपाली ओपन कन्सर्ट आयोजना गरिने मगर संघ यूकेका अध्यक्ष लालबहादुर पुन (लालु) ले जानकारी दिनुभएको छ । कार्यक्रमको तयारी जारी रहेको अध्यक्ष पुनले बताउनुभयो । उहाँका अनुसार कार्यक्रम बिहानको ११ बजेदेखि सुरु हुनेछ ।

आफ्नो कला, संस्कार, संस्कृतिलाई जीवन्त राख्न र सबै समुदायसँग गीत सङ्गीतबाट एकताको सुत्रमा बाँध्न, सबै उमेरका महानुभाव दर्शक श्रोतालाई मनोरञ्जन दिनकै लागि हरेक वर्ष नेपालबाट आउने ख्याति प्राप्त कलाकारहरुको उपस्थितिमा नेपाली ओपन कन्सर्ट हुने गर्छ । यस वर्ष कुन-कुन कलाकार कन्टर्समा आउने भन्ने आयोजकले जानकारी गराइसकेको छैन ।

गत वर्ष भने मंगोलियन हार्टका गायक राजु लामा,नरेश पुनमगर, मुना मगर, ललित पुन मगर, यज्ञ विक, प्रेम विवश घर्तीलगायतले प्रस्तुति दिनुभएको थियो । साथमा सिक्का ब्यान्डको प्रस्तुति थियो ।

सबैलाई कार्यक्रममा सहभागिताका लागि सुलभ टिकट दर तोकिएको जानकारी कार्यक्रम प्रमुख संयोजक एवं मगर संघ यूकेका वरिष्ठ उपाध्यक्ष रुद्र थापा र संयोजक महासचिव गोमन पुनले बताउनुभएको छ । वयस्कलाई अग्रिम टिकट लिँदा २५ पाउन्ड र गेटमा लिँदा ३० पाउन्ड तोकिएको छ भने बालबालिका र ज्येष्ठ नागरिकलाई अग्रिम लिँदा २० पाउन्ड र गेटमा २५ पाउन्ड तोकिएको छ ।

संघका अध्यक्ष पुनले कार्यक्रम सभ्य, भव्य र सफल बनाउन सबैलाई उपस्थितिका लागि अनुरोध गर्दै स्टल र अन्य विस्तृत जानकारी पछि सार्वजनिक गर्ने बताउनुभयो । कन्सर्टस्थलमा नेपाली खाना र सामग्रीलगायत विभिन्न व्यापारिक स्टल रहनेछन् ।

मगर संघ यूकेले ‘एकताका लागि संगीत’ सन्देशसहित सन् २००७ देखि नै बर्सेनि नेपालबाट कलाकार झिकाएर बेलायतमा ओपन कन्सर्ट गर्दै आएको छ ।