किरण पुन हत्याको आशंकामा फ्लीटबाट थप एक पक्राउ

लण्डन । करिब चार सातादेखि हराइरहेका नेपाली युवा किरण पुनको हत्याको आशंकामा प्रहरीले बेलायतको फ्लीटबाट अर्का एक जनालाई पक्राउ गरेको छ ।

ह्याम्पसायर प्रहरीका अनुसार २९ वर्षीय पुरूषलाई आज पक्राउ गरिएको हो र अनुसन्धानका लागि हाल थुनामा राखिएको छ । उनी नेपाली मूलकै हुन् वा होइनन् भन्ने प्रहरीले खुलाएको छैन ।

यसअघि सोही अनुसन्धानमा खटिएका प्रहरीहरूले २९ वर्षीय पुरुषलाई अल्डरसटबाट पक्राउ गरेको थियो । उनलाई पनि अहिले प्रहरी हिरासतमा राखिएको छ ।

प्रहरीका अनुसार डिसेम्बर १ तारिखका दिन साँझ करिब साढे ७ बजेतिर किरण पुन अल्डरसट स्टेशनबाहिर बसबाट ओर्लिएका थिए । उनी सो दिन उनको निवास विल्सायर, एम्सबरीबाट अल्डरसट आएको बुझिएको छ ।

डिटेक्टिभ इन्सपेक्टर होवार्ड ब्रोड्रिवले भनेका छन् ‘हामीहरू किरण पुनको कहाँ हुन सक्छन्, उनलाई के भएको हुन सक्छ भन्ने पत्ता लगाउन मिहिनेत गरिरहेका छौँ । उनको बारेमा सानो वा ठूलो जस्तोसुकै सूचना भए पनि दिएर सहयोग गर्न अनुरोध गर्दछौँ ।’

किरणको फार्नब्रो, अल्डरसट, बेजिङस्टोक र एण्डोभरमा पनि साथीभाइ आफन्त रहेको बताइएको छ ।  

करिब ५ फिट ८ इन्च अग्ला किरणको छोटो कालो कपाल, खैरो आँखा, पातलो अनुहार र चिउँडोमा खत रहेको बताइएको छ । उनको बारेमा केही जानकारी भए ह्याम्पसायर प्रहरीलाई १०१ मा फोन गरी रिफरेन्स नम्बर  44220510992 उल्लेख गरी जानकारी दिन सकिने छ । यसैगरी आफ्नो नाम नखुलाई ०८०० ५५५ १११ मा क्राइमस्टोपरमार्फत जानकारी दिन सकिने छ ।