लण्डन । गैरआवासीय नेपाली संघ (एनआरएनए) युकेको सदस्यता मे महिनाको अन्त्यसम्म आईपुग्दा २ हजार मात्रै पुगेको छ । एनआरएनए युके अध्यक्ष पदका चार उम्मेदवारहरुले सामाजिक संजालमा सदस्यता बनाउने अभियान चलाउने बारेमा सुचना सम्प्रेषण गर्ने र स्थानीय नेपाली अनलाईनमा समाचार प्रकाशित गर्ने वाहेक फिल्डमा फारम भर्ने कामलाई तीव्र बनाउन नसक्दा पंजीकृत सदस्य ५ हजार पुग्न समेत हम्मे हम्मे पर्ने देखिएको हो । गत कार्यकालमा करीव १४ हजार पंजिकृत सदस्य संख्या रहेको एनआरएनए युकेमा यस पटक सदस्य संख्या घटेर ५ हजारबाट नबढने संकेत देखिएको छ।
नयाँ सदस्यताका लागि आवेदन दैनिक २ सयले दिए भएपनि वाँकी १० दिनमा दुई हजार भन्दा बढी सदस्य बढने छैनन् । हालको रेसियो हेर्दा दैनिक करीव २ सय नयाँ सदस्य थपिने काम भैरहेको सिस्टमले देखाएको छ ।
एनआरएनए अमेरिकामा २० हजार भन्दा बढी सदस्यहरु भएपनि एनआरएनएको जन्मभुमि बेलायतमा ५ हजार सदस्य पुग्न मुस्किल पुगेको छ । जसमा मुख्य कारण झन्झटिलो अनलाइन प्रणाली नै भएको एनआरएनए युके अभियन्ताहरुको बुझाई छ । सदस्यता अभियान हाकिरहेका उम्मेदवारले सामाजिक संजालमा काम गरिरहे पनि त्यस अनुसारको काम गर्न सिस्टमले नदिएको सामाजिक अभियन्ता तिलक भट्टराईको अनुभव छ । ‘हामीले दिनभर २० सदस्य बनाउन पनि मुस्किल पर्यो । किनकी एमआइएस सिस्टमबाट फाराम भर्दा कोड जेनेरेटर नभएर सिस्टममै समस्या आयो’, सामाजिक अभियन्ता तथा व्यवसायी भट्टराईले वीनेपालीसँग भने ।
गत साता एमआइएस सिस्टममा आएको समस्या काठमाडौंस्थित एनआरएनए आईटि टोलीले प्राविधिक समस्या समाधान गरेका थिए । यस्ता प्रविधिका समस्याले पनि एक सदस्य बनाउन घण्टौं समय लाग्ने गरेको छ । सदस्यता अनुसार फरक फरक मोवाइल नम्बर र इमेल नयाँ जेनेरेट गर्नु पर्ने भएकाले धेरै समय लाग्ने गरेको अनुभव प्राय: सबैको छ । आर्थिक अनियमितता विवाद र मुद्दा मामलाका कारण एनआरएनप्रति नेपाली समुदाय सकारात्मक देखिएका छैनन् ।
अनलाईन फारम भर्नका लागि अध्यक्ष पदका प्रत्यासी प्रेम गाहामगरले १५ स्थानमा कार्यालय स्थापना गरेका छन । अर्का अध्यक्षका प्रत्यासी सुनिल खड्काले सदस्यता बनाउने कार्य जारी राखेको बताए । अर्का अध्यक्षका प्रत्यासी रोजिना प्रधान राईले सदस्यता बनाउने अभियानमै निस्किएकी छिन । अर्का अध्यक्षका प्रत्यासी दीपक श्रेष्ठ स्कटल्याण्ड घुमेर लण्डन फर्किएका छन ।
आगामी २०२१-२०२३ को नयाँ कार्यसमिति चयनका लागि आगामी जुलाई ३१ तारिखमा निर्वाचन हुँदैछ । आगामी जुन १० भित्र संघले तोकेको एमआइएस सिस्टममा दर्ता भएका सदस्यहरुले मात्रै नेतृत्व चयन प्रक्रियामा सहभागी हुन पाउने छन् । त्यसपछि पनि सदस्यता लिन सक्ने भएपनि उनीहरुले नेतृत्व चयन प्रक्रियामा भने सहभागी हुन पाउने छैनन् ।
