लण्डन । गैरआवासीय नेपाली संघ (एनआरएनए) युकेले आगामी कार्यकालका लागि नयाँ सदस्यका लागि आवेदन दिनेको सदस्यता प्रमाणिकरण गर्ने अधिकार थप ६ जनालाई दिएको छ । एनआरएनए युके अध्यक्ष पुनम गुरुङ, महासचिव फडिन्द्र भट्टराई र कोषाध्यक्ष तेजेन्द्र रोका मगरमा सीमित रहेको सदस्यता प्रमाणिकरणको अधिकारलाई विस्तार गरि ९ जना पुर्याइएको हो । गत आइतवारबाट उपाध्यक्षहरु प्रेम गाहामगर, रामचन्द्र पोखरेल, सुनिल वावु खड्का, नारायण कंडेल, मोहन कार्की र रोजीना प्रधान राईलाई पनि प्रमाणिकरणमा सहभागी गराइएको महासचिव फडिन्द्र भट्टराईले बताए । जसमा ६ जना उपाध्यक्षहरु छन । उनले सबै बिषयहरु पारदर्शि हुने भएकाले जिम्मेवार पदाधिकारीहरुलाई नयाँ सदस्यताको प्रमाणिकरणमा सहभागी गराउने कार्य सकारात्मक भएको प्रतिक्रिया दिए ।
एनआरएनए युके एमआइएस सिस्टममा प्रवेश गरेपछि अनलाईन मार्फत नै नयाँ सदस्यता भराइएको छ । गत १ अप्रिलबाट खुलाइएको नयाँ सदस्यता आवदेन १० जुनमा सकिदैछ । यतिवेला नयाँ सदस्यका लागि बिभिन्न पदका आंकाक्षीहरु र एनआरएनए अभियन्ताहरु सामाजिक संजाल मार्फत सदस्यता फारम भर्न आव्हान गरिरहेका छन । हालसम्म करीव ५ सय सदस्यहरुले एनआरएनए युकेको सदस्यता लिइसकेका छन भने करीव ४ सय बिभिन्न कारण प्रमाणिकरण हुन सकेका छैनन् ।
यता, एनआरएनए युके आर्थिक विवाद समाधान गर्न वार्ता गरिरहेको संरक्षक मण्डलको बैठकले संस्थापन पक्ष र चार उपाध्यक्षहरु प्रेम गाहामगर, रामचन्द्र पोखरेल, मोहन कार्की र नारायण कंडेल सँग छलफल गरिरहेको स्रोतले बताएको छ ।
