आजबाट बेलायतमा लकडाउन खुकुलो

लन्डन (जीएनएन)– बेलायतमा गत वर्षको अन्तबाट शुरु भएको लकडाउन सोमबार (मे १७) बाट खुकुलो गरिएको छ ।
लकडाउनपछि टेकअवेमा मात्र सीमित रहेका रेष्टुरेन्ट, पब तथा क्याफेहरूमा अघिल्लो हप्ताबाट आउटडोर अर्थात बाहिर बसेर खानपिन गर्न पाउने नियम लागू गरिएको थियो । सरकारको रोडम्याप अनुसार नै सोमबारबाट लकडाउनको तेस्रो चरण अनुसार थप सहज गरिएको हो ।
सन् २०२१ शुरु भएयता पहिलोपटक पब, बार , क्याफे र रेष्टुरेन्टमा इन्डोर सर्भिस संचालन भएको छ, तर टेबल सर्भिस मात्र अनुमति दिइएको छ ।
यसैगरी मानिसहरु ६ जनासम्मको समूह वा दुई परिवार घरभित्र भेटघाट गर्न र रात बिताउन पाउने भएका छन् । केही समय अघिबाट घरबाहिर गार्डेनमा मात्र भेटघाट गर्न पाउने नियम लागू गरिएको थियो ।
होटल, होस्टल, बी एण्ड बी पुनः सुचारु भएका छन् । लामो समयसम्म टेकअवे सर्भिसमा सीमित रहेका नेपाली रेष्टुरेन्ट व्यवसायीहरु सरकारको नयाँ नियमसँगै आशावादी र उत्साहित भएका छन् ।
नयाँ नियम अनुसार अब झण्डै एक वर्षपछि मानिसहरु अंकमाल गर्न पाउनेछन् । तर, सरकारले निकट सम्पर्क हुँदा भाइरसको जोखिम बढी हुने भएकाले सचेत रहन भने अपिल गरेको छ ।
अन्त्येष्टिमा यसअघि तोकिएको सीमित संख्या सहभागी हुन पाउने नियम हटाइएको छ । यद्यपि, ठाउँ हेरि सहभागितामा नियन्त्रण गर्न सकिनेछ ।
सिनेमा, थिएटर, कन्सर्ट हल र संग्रहालय पुनः खुलेका छन् । यसका साथै केटाकेटीको खेल क्षेत्र, इन्डोर खेल गतिविधि र अभ्यास कक्षाहरू, साना र स्टिम कोठा पनि खुला भएका छन् ।
कोरोना संक्रमण, मृत्यु दर र अस्पताल भर्ना हुनेको संख्यामा कमी आएसँगै सरकारको पूर्व घोषित रोडम्याप अनुरुप सोमबारबाट तेश्रो चरणमा लकडाउन थप सहज गरिएको हो । बेलायती प्रधानमन्त्री बोरिस जोन्सनले गत शुक्रबार नयाँ भेरियन्टको डर बावजुद सरकार पूर्व निर्धारित रोडम्याप अनुसार नै अगाडि बढ्ने बताएका थिए ।