मंगलबार, जेठ ४ २०७८ | Tue, May 18, 2021
नेपालको समय: ०२:०२ | UK Time: 21:17

बेलायतमा अब विवाह दर्ता प्रमाणपत्रमा बेहुला र बेहुलीको आमाको नाम पनि

वीनेपाली
२०७८ वैशाख २१ गते १०:३०

लण्डन । बेलायतमा अब विवाह दर्ता प्रमाणपत्रमा बेहुला र बेहुली दुवैको आमाको नाम उल्लेख हुने भएको छ ।

बेलायतको गृह मन्त्रालयले यससम्बन्धी कानुनमा परिमार्जन गर्दै आजदेखि दुवैको आमाहरुको नाम राख्ने प्रावधान मिलाएको हो ।

समान अधिकारका पक्षमा निक्कै अग्रणी मानिए पनि बेलायतमा हालसम्म विवाह दर्ता प्रमाण पत्रमा दुलाहा दुलहीको पिताको मात्र नाम रहने गरेको थियो ।

विवाह सम्बन्धी ऐनमा परिवर्तन गरिएपछि अब दुवै मातापिताको नाम राख्न सकिनेछ ।

बेलायतको गृह मन्त्रालयले यो निर्णयलाई ‘ऐतिहासिक असंगतिलाई सच्याएको’ बताएको छ ।

बेलायतका चार राज्यहरुमध्ये स्कटल्याण्ड र उत्तरी आयरल्याण्डमा यसअघि नै विवाह दर्ता हुँदा आमाको नाम सोधिने गरेकोमा इङल्याण्ड र वेल्समा भने यस्तो व्यवस्था थिएन । अब भने पूरा बेलायतमा नै विवाह दर्ता प्रमाणपत्रमा आमाको नाम राख्ने व्यवस्था भएको छ ।

यसैगरी मंगलबारदेखि लागू भएको सो परिवर्तित ऐन अनुसार अब विवाह दर्ताको अभिलेख विद्युतीय अभिलेखमा राखिने छ । यस निर्णयलाई सन् १८३७ यताकै सबैभन्दा ठूलो निर्णय मानिएको छ ।

यसअघि बेलायती संसदमा सबै राजनीतिक दलका सांसदहरुले विवाह दर्तामा दुवै आमाबुबाको नाम रहने कानुन ल्याउनका लागि धेरै वर्ष कोसिस गरेका थिए ।

सरकारले नयाँ नियम बेलायतको शक्तिशाली धार्मिक संस्था चर्च अफ इङल्याण्डसित परामर्शपछि ल्याएको बुझिएको छ ।

चर्च अफ इङल्याण्डका रिभरेण्ड डा मालकोम ब्राउनले विवाहका बारेमा नियम परिवर्तनको लामो इतिहास भएको र यो सीधा नभएको बताएका छन् । उनले नयाँ नियमले चर्चमा गरिने विवाहमा धेरै फरक नपार्ने विश्वास व्यक्त गरे ।

प्रतिक्रिया

सम्बन्धित सामाग्री

फेसबुक