मंगलबार, जेठ ४ २०७८ | Tue, May 18, 2021
नेपालको समय: ०१:३३ | UK Time: 20:48

एनआरएनए युके अध्यक्ष उम्मेदवार: राज्य समन्वय परिषद्बाट केन्द्रीय मैदानमा श्रेष्ठ

वीनेपाली
२०७८ वैशाख १६ गते ६:०५

 

लन्डन । गैरआवासीय नेपाली संघ (एनआरएनए) यूके अध्यक्ष पदका उम्मेदवारमा इंग्ल्याण्ड राज्य समन्वय परिषद्बाट माथि उक्लिँदै दीपक श्रेष्ठ केन्द्रीय मैदानमा आएका छन् ।

आगामी जुलाईमा हुने नयां नेतृत्वका लागि अध्यक्ष आकांक्षीहरुमध्ये राज्य समन्वय परिषद्बाट केन्द्रीय मैदानमा उत्रिने हालसम्म उनी एक्ला उम्मेदवार हुन् । श्रेष्ठ एनआरएनए इंग्ल्याण्ड राज्य परिषदका अध्यक्ष छन् । यसअघि दुई पटक उपाध्यक्ष भैसकेका प्रेम गाहामगर, उपाध्यक्षहरु सुनिलबाबु खड्का र रोजिना प्रधान राईले अध्यक्ष पदमा उम्मेदवार बन्ने बताइसकेका छन् ।
एनआरएनए अभियानमा सक्रिय श्रेष्ठ एनआरएनए यूकेकै कार्यसमिति कोषाध्यक्ष र सदस्य भएर काम गरिसकेको अनुभव छ । गत निर्वाचनबाट एनआरएनए युके चार राज्य समन्वय परिषद्मा विस्तार भएपछि उनले सबैभन्दा ठूलो इंग्ल्याण्ड राज्य समन्वय परिषद्को नेतृत्व गर्न पुगे । एनआरएनए युके सदस्यबाट सुरु गरेको यात्रालाई श्रेष्ठले अध्यक्ष जस्तो नेतृत्वदायी भूमिका निर्वाह गरी नयाँ योजना घोषणा गर्ने जनाए ।

बुद्ध फाउण्डेसन यूकेका संस्थापक अध्यक्षको जिम्मेवारी लिएर सामाजिक क्षेत्रमा आफूलाई स्थापित गरिसकेका श्रेष्ठ नेपाली समुदायलाई ऐतिहासिक योजना पस्कने तयारीमा छन् । त्यसको लागि आफ्नो हातमा एनआएनए युकेको नेतृत्व आए योजना कार्यान्वयनमा सघाउ पुग्ने विश्वास उनको छ । इंग्ल्याण्ड राज्य परिषद अध्यक्ष रहँदा कोरोना संक्रमणमा परेका नेपाली समुदायलाई गरेका मानवीय कार्यहरुमध्ये कोभिड राहत कोषको जिम्मा लिएर एनआरएनए युकेमार्फत नेपाली समुदायलाई ठूलो सहयोग गर्ने मानवीय कार्यको नेतृत्व गरे ।
बेलायत कोरोना महामारीका कारण लकडाउनमा परेका विश्वविद्यालयमा विद्यार्थीहरुलाई आर्थिक सहयोगसहित बासको व्यवस्था गर्ने कार्यमा अहोरात्र खटिए । श्रेष्ठले कोरोनाको संक्रमणका बेलामा पनि नेपाली समुदाय भनेपछि सहयोगका लागि सधै अग्रपंक्तिमा रही आर्थिक सहयोग गरे । २१ मार्चको जनगणनामा नेपालीको पहिचान स्थापित गराउन एनआरएनए युकेले उनलाई नै विशेष अभियानको जिम्मेवारी दियो । आफ्नो जिम्मेवारीलाई ठोस रुपमा कार्यान्वयन गर्न उनले बेलायतभरका नेपाली समुदायलाई एकीकृत गरी जनगणनामा सामेल गराए । युवा पुस्तालाई नेपालीको पहिचान स्थापित गर्ने सवालमा परिचालन गर्दै समुदायले देख्ने गरी काम गरेर आफूलाई स्थापित गरेको उनको बुझाइ छ ।

बुद्ध फाउण्डेसन यूकेका अध्यक्ष श्रेष्ठले लन्डनको मुटु ट्राफलगर स्क्वायरमा बुद्ध जयन्ती मनाउने परम्परा शुरु गरे । भारतले बुद्ध आफ्नो देशमा जन्मिएको भ्रमलाई अन्तर्राष्ट्रिय स्तरमा निराकरण गर्न सो अभियान शुरु गरेको उनको भनाइ छ । जसमा बुद्ध फाउण्डेसन यूके र कपिलवस्तु समाज यूकेको आयोजना तथा लन्डनस्थित नेपाली दूतावास, एनआरएनए यूके, नेपाल पर्यटन बोर्ड बेलायतलगायतका सहयोग रहँदै आएको छ ।
त्यसबाहेक बुद्ध फाउण्डेसन यूकेले कपिलवस्तुमा वुद्ध वृद्धाश्रम पनि निर्माण गरिरहेको छ ।

हालै राज्य समन्वय परिषदले लन्डन वुलवीच–ब्राइटन च्यारिटी साइकल यात्रा गर्यो । उक्त कार्यक्रम मार्फत संकलित रकममध्ये हेल्प नेपाल नेटवर्कद्वारा धुलिखेलमा सञ्चालित बालगृहलाई ४ लाख रुपैयां र बुद्ध फाउण्डेशन यूकेद्वारा कपिलवस्तुमा निर्माणाधिन बुद्ध वृद्धाश्रमका लागि एक लाख ९२ हजार रुपैयां हस्तान्तरण गरिसकिएको छ ।

यसैगरी परिषदले ‘नेपालमा गैरआवासीय नेपालीहरुको सम्पतिको अधिकार र नागरिकता निरन्तता’ बारे एक अन्तरक्रिया गरी अल्डरसट सुझावपत्र जारी गरेको छ ।
‘सामाजिक कार्यलाई निरन्तरता दिन संघ संस्था र नेपाली समुदायका अगुवाहरुको आग्रहमा एनआरएनए यूकेको नेतृत्वका लागि तयार भएको हु’, उनले भने ।

बेलायतमा युवा नेपाली व्यवसायीका रुपमा स्थापित श्रेष्ठले व्यवसायसँगै सामाजिक कार्यलाई निरन्तरता दिइरहेका छन् । लण्डनको दक्षिण पूर्वमा बसोवास गर्दै आएका श्रेष्ठले फार्मेसी, क्यास एण्ड क्यारी, पब र प्रोपर्टी व्यवसायमा लगानी गरेका छन् । नेपालमा बेलुन नेपाल प्रा. लि., लुम्बिनी क्रसर प्रा. लि., हिमालयन ग्लोवल इन्भेष्टमेन्ट प्रा. लि. मार्फत जन्मभूमि नेपाललाई आर्थिक सहयोग पुर्याइरहेका छन् ।
एनआरएनए युके सदस्यता ड्राइभको अभियानमा लागेका श्रेष्ठले औपचारिक रुपमा पत्रकार सम्मेलन गरी उम्मेदवारी घोषणा र प्रतिबद्धतापत्र सार्वजनिक गर्ने जनाए।

प्रतिक्रिया

सम्बन्धित सामाग्री

फेसबुक