प्रिन्स फिलिपको अन्त्येष्ठी आज, नेपाली समुदायले पनि श्रद्धाञ्जलि दिँदै

लण्डन । बेलायतका प्रिन्स फिलिपको अन्तिम सँस्कार शनिबार विन्जर क्यासलमा हुँदैछ ।
उनको सम्मानमा आज दिउँसो बेलायतको समयअनुसार ३ बजे एक मिनेट मौनधारण गरिँदैछ ।
कोभिड १९ का कारण अन्तिम सँस्कारमा ३० जनालाई मात्र उपस्थित हुन दिने बेलायतको नियम पालना गरिएको छ । तर उनको सम्मानमा देशैभरि सम्मान भने दिइने छ ।
उनको अन्तिम सँस्कारको बीबीसी लगायत अन्य मिडियाहरुले लाइभ प्रसार गर्दैछन् ।
फिलिपको शवलाई उनकै सहयोगमा बनाइएको ल्याण्डरोभरमा राखेर शव यात्रा गराइनेछ ।
प्रिन्स फिलिपको सम्मानमा नेपाली समुदायले पनि विशेष समारोह गर्दैछन् । ननिटनस्थित ब्रिटिश गोरखा भेटरान एसोसिएसनले शनिबार दिउँसो ठीक ३ बजे स्थानीय पार्कमा सम्मान कार्यक्रम आयोजना गरेका छन् ।
एसोसिएसनका महासचिव भीम सारुका अनुसार प्रिन्स फिलिपको बेलायतका लागि योगदानका साथै नेपालप्रतिको सद्भावका लागि एसोसिएसनले सो सम्मान व्यक्त गर्न लागेको हो ।
प्रिन्स फिलिपको अप्रिल ९ तारिखमा ९९ वर्षको उमेरमा आफ्नै निवासमा निधन भएको थियो ।