गेसोद्वारा गोरखा समस्याबारे राजदुत रेग्मीको ध्यानाकर्षण

लण्डन । बेलायतका लागि नवनियुक्त राजदुत लोकदर्शन रेग्मीसित गोरखा भूतपूर्व सैनिक संघ (गेसो) को एक प्रतिनिधि टोलीले भेट गरी गोरखा भूतपूर्व सैनिकका समस्या यथाशीघ्र समाधानका लागि माग गरेको छ ।

गेसोका कार्यबाहक सभापति धर्मबहादुर तामाङको नेतृत्वमा गएको सो टोलीले राजदुत रेग्मीका साथै उपनियोग प्रमुख रोशन खनाल, सैनिक सहचारी रत्नबहादुर गोदारलाई बेलायतमा स्वागत, नयाँ वर्षको शुभकामनाका साथमा गोरखा भूतपूर्व सैनिकहरुको समस्याका बारेमा ध्यानाकर्षण गराएको थियो ।

गेसो प्रतिनिधि मण्डलले गोरखाहरुको समस्याका बारेमा बनेको प्राविधिक समितिले बनाएको १३ बुँदे प्रतिवेदनको कार्यान्वयनका लागि माग गरेका थिए भने राजदुत रेग्मीले गोरखाहरुको समस्या समाधानका लागि आफूले पहल गर्ने आश्वासन दिएका थिए ।

टोलीमा गेसोका महासचिव दशरथ राई, कोषाध्यक्ष देवीमाया पुन, सचिवालय सदस्य तथा प्राविधिक समितिका सदस्य नरहाङ राई, केन्द्रीय सदस्य मानबहादुर गुरुङ सहभागी थिए ।