एनआरएनए युकेको नयाँ सदस्य ड्राइभको तयारीमा उम्मेदवारका आकांक्षीहरु

लण्डन । गैरआवासीय नेपाली संघ (एनआरएनए) युके र राज्य समन्वय परिषद्हरुको निर्वाचनले बिस्तारै गति लिन सुरु गरेको छ । सामाजिक संजालमा अनलाइन मार्फत फारम भरेका तस्बिरहरु पदका आकांक्षीहरुले सार्वजनिक गर्न थालेका छन ।
बिगतमा जस्तो पेपर फारम भर्नको सट्टा यस पटक अनलाइन मार्फत फारम भर्ने झन्झटिलो व्यवस्थाले सामाजिक संजाल मार्फत सदस्यता लिन अनुरोध गर्ने खालेको भ्यासेज डेलिभरी गर्न थालिएको हो । एनआरएनए युके उपाध्यक्ष सुनिल वावु खड्काले ‘राजनैतिक परिवर्तन केबल एउटा घोषणाबाट हुन सक्छ । तर सामाजिक परिवर्तन निश्चिय नै समय लाग्न सक्छ । आउनुहोस यस सामाजिक परिवर्तनको दर्शक हैन अभियन्ता बनौ’ भन्दै फेसवुकमा लेखेका छन ।
त्यस्तै, इंग्ल्याण्ड राज्य समन्वय परिषद् अध्यक्ष दिपक श्रेष्ठले पनि सामाजिक संजालमा ‘आफ्नो रोजाईको नेतृत्व चयन गर्न सदस्यता लिन’ आग्रह गरेका छन । त्यस्तै, उपाध्यक्ष रोजीना प्रधान राईले सामाजिक संजाल मार्फत नै एनआरएनए युकेमा नयाँ नेतृत्व चयनका लागि सदस्यता फारम भर्नका लागि अनुरोध गरेकी छिन ।

अर्का उपाध्यक्ष प्रेम गाहामगरले बेलाभरमा रहेको भुतपुर्व गोर्खाहरुलाई एक ठाउँमा जमघट गराई उनीहरुको समस्याका बारेमा नेतृत्व गर्ने घोषणा गरिसकेका छन । उनले सामाजिक संजालमा भन्दा पनि फोन मार्फत समाजका अगुवाहरुसँग सदस्यताका ड्राभइका बारेमा कुराकारी गरिरहेका छन ।
एनआरएनए युकेमा अध्यक्ष पदका आंकाक्षीहरु धेरै रहेपनि औपचारिक रुपमा कसैले उम्मेदवारी घोषणा गरेका छैनन । सदस्यता संख्या बढी भन्दा बढी बनाई नेतृत्वमा दावी गर्ने विगतको प्रचलनलाई  भने यस पटक अनलाईन फारमले अप्ठ्यारो पार्ने देखिन्छ । पुर्व गोर्खा परिवारजनहरु बृद्धबृद्धा भएको र स्मार्ट डिभाइस समेत नचलाउने भएकाले आगामी दिनमा समस्या आइपर्ने आशंका गरिएको छ । यद्यपी आफ्नै भोट घट्ने अवस्था आए यो प्रावधानलाई खुकुलो बनाउने सोचमा संस्थापन रहेको स्रोतले बतायो ।
एनआरएनए युकेले डेस्कटप वा ल्यापटपमा members.nrna.org टाईप गरी देशमा UK छानेर सदस्यता फाराम भर्न सकिने बताइएको छ । सदस्यता आवेदन गर्दा परिचयपत्र र ठेगाना खुल्ने कागजात अपलोड गर्न पर्ने बताइएको छ । सदस्यता आवेदन गर्ने मिति १ अप्रिलदेखि १० जुन २०२१ सम्म तोकिएको छ ।