लण्डन । गैरआावासीय नेपाली संघ (एनआरएनए) युके कार्यसमितिले बहुमतका आधारमा गठन गरिएको तीन सदस्य समितिले बुझाएको छानविन प्रतिवेदन सार्वजनिक गर्ने बिषयमा सोमबार छलफल गर्ने भएको छ । एनआरएनए युके अध्यक्ष पुनम गुरुङले प्रस्ताब गरिएकै मानिसहरु रहेको समितिले तयार गरेको प्रतिवेदन झण्डै तीन सातापछि प्रतिवेदन सार्वजनिक गर्ने बिषयमा छलफल गर्न कार्यसमिति बैठक बोलाएको हो ।
एनआरएनए युके महासचिब फडिन्द्र भट्टराईले अध्यक्ष पुनम गुरुङको अध्यक्षमा सोमबार साँझ बस्ने बैठकमा एनआरएनए युके सदस्यता, विधान संशोधन र जाँचबुझ समितिको प्रतिवेदन लगायतको बिषयमा छलफल गर्ने एजेण्डा तय गरेको सुचना कार्यसमिति सदस्यहरुलाई पठाएका छन ।
एनआरएनए युके आर्थिक अनियमितता छानविन समिति संयोजक चार्टर्ड एकाउन्टेन्ट एलएन पाण्डेले दुई साता अघि एनआरएनए युके कार्यसमिति अध्यक्ष पुनम गुरुङलाई छानविन प्रतिवेदन बुझाएको समाचार वीनेपाली डटकमले प्रकाशित गरेको थियो । संयोजक चार्टर्ड एकाउन्टेन्ट एलएन पाण्डेले सार्वजनिक गर्ने बिषय कार्यसमितिको रहेको बताए ।
गत सेप्टेम्बरमा बसेको एनआरएनए युके कार्यसमितिको पुर्ण बैठकले विवादका विच संयोजक चार्टर्ड एकाउन्टेन्ट एलएन पाण्डे र सदस्यद्वय डा. मुकुन्द बस्तोला र रि. मे. बुद्धि गुरुङ रहेको छानविन समिति गठन गरेको थियो । समितिले विगतमा एनआरएनए युके कार्यसमितिले र निर्वाचन समितिले गरेको खर्च तथा आर्थिक बिषयहरु सँग जोडिएका व्यक्तिहरु सँग अन्तरवार्ता गरेको संयोजक पाण्डेले जनाए । उनका अनुसार छानविन समितिले हिसाब किताब, रिपोर्ट र कारवाहीका लागि सिफारिस समेत गरेको छ ।
५ वटा अलग अलग फाइलमा बनाइएको रिपोर्टमा छानविन समितिका तीनै जनाको सहमति रहेको छ । समितिले पुर्व अध्यक्ष योगकुमार फगामीदेखि निर्वाचन प्रमुख आयुक्त रि।मे डम्मर घलेसम्मको अन्तरवार्ता लिइएको बताइन्छ ।
