लण्डन । बेलायतका नेपालीहरुबीच लोकप्रिय गोर्खा कप जुलाई २४ मा हुने भएको छ ।
सरकारले जुन २१ देखि बेलायतमा लकडाउन हटाउने निर्णय गरेका कारण गोर्खा कपलाई निरन्तरता दिने निर्णय गरिएको आयोजक तमुधिँ युकेका अध्यक्ष हितकाजी गुरुङले जानकारी दिए ।
गत वर्ष लकडाउनका कारण तमुधिँ युकेले आयोजना गर्ने ठूला कार्यक्रमहरु गोर्खा कप र नेपाली मेला दुवै हुन सकेन । तर यस वर्ष भने गोर्खा कप र नेपाली मेला दुवै सन्चालन गर्ने निर्णय गरिएको अध्यक्ष गुरुङले बताए ।
अल्डरसटस्थित क्वीन्स एभेन्यूमा हुने गोर्खा कपका लागि खेल मैदानको तय भैसकेको पनि अध्यक्ष गुरुङले बताए । गोर्खा कप सन्चालन गर्न सयौँ स्वयंसेवकका साथ साथै स्थानिय काउन्सिललगायत धेरैवटा सरकारी निकायहरुसित बैठकका श्रृंखला नै चल्छ । सधैँ यसका लागि पूर्व निर्धारित समयतालिका नै हुन्थ्यो तर यसपटक त्यतिबेला भन्दा छोटो समयमा कार्यक्रम गर्न परेको छ । अध्यक्ष गुरुङ भन्छन्, ‘बैठकहरु पनि छिटोछिटो गर्नपरेको छ भने हामी पनि सधैँ सप्ताहन्तमा मात्र खट्ने गरेकोमा अहिले हप्ताको तीन दिन खट्ने भएका छौं ।’
यसबीचमा सरकारको योजनामुताबिक काम अगाडी बढे सबै समस्या सामान्य हुनेमा अध्यक्ष गुरुङ आशावादी छन् । ‘सरकारको योजनाअनुसार पनि जुलाई अन्त्यसम्ममा धेरैले कोरोना विरुद्धको खोप पाइसक्ने छन्’ उनले सम्भावित अवस्थाको आँकलन गर्दै भने । यदि अपेक्षा गरेभन्दा प्रतिकूल भएमा के गर्नुहुन्छ भन्ने काल्पनिक प्रश्नमा उनले ‘सरकारले तय गरेको निर्देशनअनुसार गर्ने’ बताए ।
विगतका वर्षहरुमा गोरखा कप मे महिनाको अन्तिम सप्ताहन्तमा हुने गरेको थियो ।
