सोमबारदेखि बेलायत छोड्न फाराम भर्नुपर्ने, २०० पाउण्ड जरिवाना हुनसक्ने

लण्डन । सोमबारदेखि इङल्याण्डबाट अन्य देशमा यात्रा गर्नेहरुले उचित कारणहरु दर्शाइ फाराम भर्नपर्ने भएको छ । सरकारले तोकेको बाहेकका कारणबाट विदेश यात्रा गर्न गएको ठहर भएमा यात्रुहरुलाई २०० पाउण्ड जरिवाना समेत हुन सक्नेछ ।

यस्तो फाराम सरकारको वेभसाइट जीओभीडट युकेमा उपलब्ध हुनेछ र इङ्ल्याण्ड छाड्ने यात्रुले आफूले बेलायतबाट यात्रा गर्नुको कारण खुलाउनु पर्नेछ । यस्तो फाराम भरेर मोवाइलमा डाउनलोड गर्न वा प्रिन्ट गर्न सकिने छ । बेलायतका अन्य राज्यहरु स्कटल्याण्ड, वेल्स र नर्देन आयरल्याण्डले भने यसबारेमा अलग नियम बनाएका छन् ।

बेलायतमा अहिले पनि लकडाउन जारी छ र सरकारको निर्देशनअनुसार कामका लागि, अध्ययनका लागि र स्वास्थ्यका कारणले मात्र बेलायत छाड्न पाइन्छ । तर विदा मनाउनका लागि समेत मानिसहरु बाहिरिन थालेपछि सरकारले यस्तो निर्णय गरेको हो । यसबाट कोरोनाको खोप लगाउँदै नेपाल जान खोज्ने नेपालीहरुलाई पनि असर पर्नेछ ।

तीन पेज लामो सो फर्ममा व्यक्तिगत विवरणका साथै यात्रा गर्नुको कारण छान्नुपर्नेछ ।
प्रहरीले पनि पछिल्लो समयमा बन्दरगाह र विमानस्थलहरुमा गस्ती बढाएको छ भने सोमबारदेखि उनीहरुलाई यात्रा गर्नुको कारण सोध्न र भरिएको फाराम निरीक्षण गर्न अनुमति दिइएको बेलायतको यातायात मन्त्रालयले जनाएको छ । यस्तो फाराम नभरीकन यात्रा गर्नुलाई आपराधिक कार्यको सूचीमा राखिएको छ । तर १८ वर्षमुनीका र फाराम भर्न सक्ने शारीरिक क्षमता नभएकाहरुलाई यो नियम लागू हुने छैन तर उनीहरुका साथमा यात्रा गर्ने वयस्क यात्रुले उनीहरुका लागि यस्तो फाराम भरिदिनु पर्नेछ ।

फाराम नभर्ने र उचित कारण बिना बेलायत छोड्न चाहनेलाई २०० पाउण्ड जरिवाना र घर फर्कन आग्रह गरिनेछ । सरकारको घरमै बस्नु भन्ने निर्देशन पालना नगरेकोमा उनीहरुलाई थप नगद जरिवाना पनि हुन सक्नेछ ।
बेलायतमा सरकारले मे १७ भन्दा अगाडी विदा मनाउन अनुमति दिएको छैन ।

पेशागत कार्यका कारण बेलायतबाहिर गइरहन पर्नेहरुलाई भने यस नियम लागू हुने छैन । जसमा पाइलट र क्याविन क्रुहरु, एरो स्पेश इन्जिनियरहरु, बीबीसीका कर्मचारीहरु, सीमा रक्षकहरु लगायत छन् ।

प्रतिक्रिया

सम्बन्धित सामाग्री