काठमाडौं नेकपा प्रचण्ड-माधव समूहकी नेतृ तथा विघटित प्रतिनिधि सभाकी सांसद रामकुमारी झाँक्रीलाई प्रहरीले पक्राउ गरेको छ । महानगरीय अपराध महाशाखाको टोलीले झाँक्रीलाई बिहीबार उनकै घरबाट गिरफ्तार गरेको हो ।
राष्ट्रपति विद्यादेवी भण्डारीबारे दिएको अभिव्यक्तिलाई लिएर प्रहरीले काठमाडौँ सामाखुसीस्थित उनकै निवासबाट झाँक्रीलाई गिरफ्तार गरेको हो ।
प्रहरीले नेतृ झाँक्रीलाई राज्यविरूद्धको कसुर गरेको भन्दै पक्राउ पुर्जी थमाएको थियो । पक्राउ पूर्जी बुझेसँगै नेतृ झाँक्रीले प्रहरीलाई गिरफ्तारी दिएकी हुन् ।
यसअघि महाशाखाले झाँक्रीलाई सोधपुछका लागि बोलाएको थियो, तर झाँक्री उपस्थित नभएपछि प्रहरी गिरफ्तार गर्न उनको घरमै पुगेको थियो । त्यसपश्चात नेतृ झाँक्रीले पक्राउ पूर्जी ल्याए आफु गिरफ्तारी दिन तयार रहेको बताएकी थिइन् ।
झाँक्रीको पक्राउको विरोधमा उनको निवासबाहिर नेकपा प्रचण्ड-माधव समूहका कार्यकर्ताहरू भेला भएर सरकार र प्रहरी प्रशासनविरुद्ध नारा लगाएका थिए ।
गोरखाको एक कार्यक्रममा नेतृझाँक्रीले राष्ट्रपति विद्यादेवी भण्डारीबारे टिप्पणी गरेकी थिइन् । उनले गोरखामा नेकपा एमालेले मदन भण्डारीको हत्यापछि सेतो साडी लगाएर चुनावमा उठाउने गलत संस्कृति शुरू गरेको आरोप लगाएकी थिइन् ।
मदन भण्डारीको हत्यापछि तत्कालिन एमालेले २०५० सालमा विद्यादेवी भण्डारीलाई चुनाव लडाउनु भुल भएको झाँक्रीको भनाइ थियो । सोही टिप्पणीलाई लिएर नेकपा ओली निकट अखिल नेपाल महिला संघले गृहमन्त्रीलाई ज्ञापन पत्र बुझाउँदै झाँक्री विरुद्ध कारवाहीको माग गरेको थियो ।
