बेलायतमा अस्पतालका शव गृह भरिएपछि शव राख्न विकल्पको खोजी

लण्डन । बेलायतमा कोरोना भाइरसका कारण धेरै मानिसहरुको मृत्यु हुन थालेपछि उनीहरुको शव राख्नका लागि अस्थायी शव गृहहरु खोज्न थालिएको छ ।

स्थानीय अस्पतालहरुमा उपलब्ध शव गृहहरुमा स्थान अभाव भएपछि शव व्यवस्थापनका लागि अस्थायी संरचनाको व्यवस्था गरिएको हो ।

दक्षिणी लण्डनस्थित सरे काउन्टीमा ६०० वटा शव राख्न सक्ने क्षमता रहेकोमा स्थानीय अधिकारीहरुले अस्थायी शव गृहको प्रयोग गर्न थालेका छन् ।

सरे रिजिलेन्स फोरमका प्रवक्ताले मृत्यु भएका बिरामीहरुलाई अस्पतालको शैय्यामा राखिरहनु वा विदेशमा देखिएजस्तो करिडोरमा राख्नुभन्दा पूर्ववत् शव गृह भरिएकाले अस्थायी शवगृहमा राख्ने गरेको स्वीकार गरे । मृतकका आफन्तले अस्थायी शवगृहमा सम्पर्क गरी शव संकलन गर्न सक्ने बताए ।

अहिले लेदरहेडमा रहेको हेडली कोर्टमा १७० वटा शव राखिएको पनि प्रवक्ताले जानकारी दिएका छन् । सो शव गृहको कुल क्षमता ८४५ वटा शव राख्नसक्ने रहेको छ । ”अप्रिलदेखि जुनसम्मको १२ हप्तामा ७०० वटा शव राख्नु परेको थियो तर बितेको तीन सातामा मात्र ३३० वटा शव राख्नुपर्यो” उनले भने ।

उता यस्तै समस्या बेलायतको केन्ट लगायत अन्य स्थानमा पनि निम्तिएको बताइएको छ ।

यसअघि पहिलो वेभका बेलामा पनि गत वर्ष लण्डनमा अस्थायी शव गृहको व्यवस्था गरिएको थियो ।

बेलायतमा कोरोना संक्रमण भएको २८ दिनभित्रमा मृत्यु हुनेहरुको संख्या ८० हजार नाघिसकेको छ । कोरोनाका कारण धेरै मानिसहरु गुमाउने मुलुकमा बेलायत पाँचौँ मुलुक हो ।