लन्डन । बेलायती राजकुमार ह्यारीले नेपाल भ्रमण गर्ने भएका छन् । 
केन्जिङ्टन प्यालेसले ट्वीटर मार्फत प्रिन्स ह्यारीको पहिलो औपचारिक नेपाल भ्रमण आगामी वसन्त ऋतु (स्प्रीङ) हुने जानकारी शुक्रबार दिएको हो । भ्रमणको विस्तृत विवरण आउन बांकी छ ।

लन्डनस्थित नेपाली दूतावासले भने अहिलेसम्म यसको औपचारिक जानकारी नपाएको कार्यवहाक राजदूत तेजबहादुर क्षेत्रीले जनाए ।

यसअघि बेलायतबाट महारानी एलिजावेथ द्वितिय र प्रिन्स फिलिपले सन् १९६१ र १९८६ मा नेपाल भ्रमण गरेका थिए । राजकुमारी डायना, प्रिन्स चाल्र्ससहित बेलायती मन्त्रीहरु धेरैले नेपाल भ्रमण गरिसकेका छन् ।

प्रिन्स ह्यारीले बेला बेला ब्रिटिश गोर्खा सैनिकको प्रशंसा गर्दै आएका छन् । 
अफगानिस्तान युद्धमा गोर्खाहरुसंगै बिताएका ह्यारीले आफू गोर्खाहरुसंग बस्दा सबैभन्दा बढि सुरक्षित भएको बताउंदै आएका छन् ।

बेलायती प्रधानमन्त्री डेभिड क्यामरुनको भने नेपाल भ्रमण 
गर्ने खवर सार्वजनिक भएपनि यकिन भइसकेको छैन् । गत महिनामात्र नेपालका उपप्रधान तथा परराष्ट्रमन्त्री कमल थापाले बेलायत आएका बेला प्रधानमन्त्री केपी ओलीको नेपाल भ्रमणका लागि औपचारिक निम्तो क्यामरुनलाई दिएका छन् ।