बेलायतले पत्याएन ज्योति मगरलाई

लन्डन । कार्यक्रम गर्न बेलायत आउन लागेकी गायिका ज्योति मगरको भिजा अस्वीकृत भएको छ । उनको भिजा अस्वीकृत भएपछि नव गठित ब्रिटिश गोर्खा नेपलिज काउन्सिलले गत ४ डिसेम्बरमा ननिटनमा गर्ने तय भएको गोर्खा कल्चरल नाइट पनि रद्द भएको छ । आयोजकले गायिका मगरलाई साढे ४ लाख रुपैयां दिने र त्यो वापत उनले यूकेमा १२ वटा शो 
गर्ने सम्झौता भएको थियो ।

कार्यक्रमका लागि करिब ३ सय वटा टिकट विक्री भइसकेको अवस्थामा कलाकारको भिजा नलाग्दा आयोजक दुःखी छन् । ‘ज्योति मगर र गायक ताराप्रकाश लिम्बुको भिजा नलागेपछि कार्यक्रम नै रोक्नु पर्यो’, आयोजक ब्रिटिश गोर्खा नेपलिज काउन्सिलको कलाकार विभागकी संयोजक रोमियन लिम्बुले वीनेपालीसंग भनिन् । संगै आवेदन दिएका नृत्य निर्देशक गोविन्द राई र कमेडियन महेन्द्र बग्दासको भने भिसा लागेको छ ।

अब जनवरीतिर अरु कलाकार ल्याएर कार्यक्रम गर्ने योजना बनेपनि विस्तृत तय भइनसकेको लिम्बुले जनाइन् ।

पछिल्लो २ वर्षयता ज्योति नेपाली मनोरञ्जनको क्षेत्रमा चर्चामा छिन् । ज्योति मगर गीतको चर्चासंगै नग्न भिडियो र फोटो सुटका कारण पटक पटक विवादमा आइरहने गायिका हुन् । छोटो पहिरन र कामुक शैली उनको परिचय बनेको छ । दर्शकहरु उनको उत्तेजक हाउभाउ हेर्नकै लागि कार्यक्रम पुग्ने गर्छन् । तीज गीत ढाडे बिरालोको भिडियोमा उत्तेजक अभिनय गरेपछि भिडियो अश्लील भन्दै उनको देश विदेशबाट व्यापक आलोचना भएको थियो ।

‘रातो साडी रातै छ कलर, एक रात सुत्न १ हजार डलर’ शीर्षकको तीज गीत छायांकन गर्ने क्रममा पार्टी प्यालेसमा मेकअप गरेर तयार भएकी ज्योतिलाई स्थानीय महिलाहरूले कुटेको समाचार एकाएक भाइरल भएको थियो ।

अश्लील र भड्किलो भएकै कारण नेपाल टेलिभिजनमा प्रसारण हुने टि–टाइम शीर्षकको कार्यक्रमलाई दिएको अन्तर्वार्ता प्रतिबन्धित भएपछि ज्योतिको विवादास्पद यात्रा शुरु भएको मानिन्छ ।