बेलायतका नेपाली इन्जिनियरले पुनर्निर्माणको खाका पठाउने

लन्डन । बेलायतका नेपाली इन्जिनियरहरुले भूकम्पपछि नेपालको पुनर्निर्माणमा सघाउने भएका छन् । सोसाइटी अफ नेपलिज इन्जिनियर्स, यूकेले पुनर्निर्माणमा आफ्ना वीज्ञहरुमार्फत सक्दो सघाउने भएको हो ।

नेपालको पुनर्निर्माणमा कसरी सहयोग गर्न सकिन्छ भन्नेबारे सोसाइटी अफ नेपलिज इन्जिनियर्स, यूकेले एउटा वृहत सेमिनार समेत गर्ने तयारी गरेको छ । भूकम्पपछि पुनर्निर्माणः चुनौती र अवसरहरु विषयक एक सेमिनार गर्न लागिएको हो ।

सोसाइटीले सम्वन्धित क्षेत्रका वीज्ञहरु निम्त्याएर सेमिनार गरि त्यसको निष्कर्ष, समाधान र विकल्प नेपाल सरकार, विकास एजेन्सी र पुनर्निर्माण प्राधिकरणलाई पठाउने सोसाइटीका महासचिव राजेश पाठकले वीनेपालीलाई जनाए । गत अप्रिल २५ र मे १२ को विनाशकारी भूकम्पले हजारौंको ज्यान गएको स्मरण गर्दै इन्जिनियर पाठकले नेपालका विश्व सम्पदा सूचीमा सूचीकृत स्थलहरु, राष्टिय संरचना, घर, स्मारक आदि ध्वस्त भएको परिप्रेक्ष्यमा सेमिनारमा पुनर्निर्माणका चुनौती र सम्भावनाबारे विस्तृत छलफल गरिने जनाए ।

२८ नोभेम्बरका दिन लन्डनस्थित गोल्डेनसीप रेष्टुरेन्टमा सेमिनार हुन लागेको हो । सेमिनारमा प्रश्नोत्तर, विभिन्न वीज्ञहरुबाट कार्यपत्र प्रस्तुत र छलफल समावेश गरिएको छ ।

सोसाइटीले भूकम्प लगत्तै आफ्ना इन्जिनियर सदस्यहरुलाई नेपाल पठाएर मानवीय सहयोग तथा क्षतिग्रस्त भौतिक संरचनाको पुनरावलोकन गरेको थियो ।