लन्डन । तीन दिने बेलायत भ्रमणका सिलसिलामा लन्डन उत्रिएकै दिन भारतीय प्रधानमन्त्री नरेन्द्र मोदीविरुद्ध बेलायतस्थित नेपालीहरुले विशाल विरोध प्रदर्शन गरेका छन् ।
भारतले नेपालमा लगाइरहेको अघोषित नाकाबन्दीको विरोधमा नेपालीले बिहीबार गरेको शान्तिपूर्ण आन्दोलनमा सयौं सहभागी भए । बेलायती प्रधानमन्त्री कार्यालय टेन डाउनिंग स्ट्रिट अगाडि मध्यान्ह १२ बजे देखि प्रदर्शन शुरु भएको हो ।
बेलायतका विभिन्न शहरबाट स्वतस्फूर्त ओइरिएका प्रदर्शनकारीले मोदी र भारतको विरोध गर्दै लेखिएका नारा अंकित ब्यानर र प्लेकार्ड बोकेर प्रदर्शन गरिरहे । उनीहरुलाई भारतीय सिख समुदायले समेत साथ दिएका थिए । प्रदर्शनका कारण बेलायती संसद र प्रधानमन्त्री कार्यालय पुरै अस्तव्यस्त थियो भने सुरक्षा व्यवस्था अत्यन्त कडा तुल्याइएको थियो ।
प्रदर्शनका लागि गैर आवासीय नेपाली संघ बेलायत, प्रवासी नेपाली मञ्च यूके, नेपाली जनसम्पर्क समिति, बेलायतसहित यूकेका प्रमुख तीन दर्जन बढि नेपाली संघसंस्थाले ऐक्यवद्धता जनाउंदै सहभागिता जनाएका थिए । तीन युवा विज्ञान प्रसाईं, एभरेष्ट गौतम र गणेश खड्काले प्रदर्शनको तयारीमा विशेष सक्रियता देखाएपछि अन्य संघसंस्था र युवाहरु स्वतस्फूर्त सहभागी भएका थिए ।
भारतको अघोषित नाकाबन्दी र भूपरिवेष्ठत राष्ट्र नेपालले अन्तर्राष्ट्रिय कानुन अनुसार पाउने पारवहान सुविधाका विषयमा अन्तर्राष्ट्रिय समुदायको ध्यानाकर्षण गराउन प्रदर्शन गरिएको आयोजकले जनाएका छन् ।
राष्ट्रमाथि ठूलो चुनौती आइपरेका बेला व्यक्तिगत तथा संस्थागत स्वार्थभन्दा माथि उठेर सबैले सामना गर्नुपर्ने बेला आएको जनाउंदै भेलाका सहभागीले नेपालको आन्तरिक मामिलामा हस्तक्षेप नगर्न चेतावनी दिए । उनीहरुले नेपाल सरकारलाई भारतको गैर कानुनी नाकाबन्दी विरुद्ध अन्तर्राष्टिय निकाय गुहार्न समेत आग्रह गरेका छन् । अन्तर्राष्टिय कानुन अनुसार नेपालको पारवहन अधिकार हनन गरेको ठानेका प्रदर्शनकारीले नेपालमाथि हस्तक्षेप नगर्न नारा मार्फत पटक पटक चेतावनी दिएका थिए । प्रदर्शन बेलायतका नेपालीको मात्र होइन, विश्वभरका नेपालीमा भारत र प्रधानमन्त्री मोदी विरोधी भावना जागृत भएको छ । भारतले ढिलो चांडो नाकाबन्दी त खोल्ला तर नेपालीको दुःखेको मन पूवर्वत अवस्थामा फर्किन केही समय पक्कै लाग्नेछ ।
मोदीलाई आफ्नै समुदायबाट विरोध
मोदीविरुद्ध भारतीय नै विरोधमा उत्रिएका छन् । आवाज नेटवर्कले मोदी नट वेलकम अभियान शुरु गरेको छ । उसलाई साउथ एसिया सोलिडारिटी ग्रप, कास्ट वाच यूके, भारतीय मुश्लिम र दलितहरुको पक्षमा वकालत गर्ने र समूहले साथ दिएका छन् । ति संघसंस्थाले शुक्रवार वेम्ली स्टेडियममा पनि प्रदर्शन गर्ने भएका छन् । मोदीले स्टेडियममा करिब ६० हजार भारतीय डायस्पोरालाई सम्वोधन गर्ने कार्यक्रम छ ।
भारतीय जनता पार्टीका नेता मोदीलाई सन् २०१२ सम्म बेलायत आउन प्रतिवन्ध थियो । सन् २००२ मा गुजरातको मुख्य मन्त्री हुंदा मोदीलाई मुस्लिम विरोधी दंगा रोक्न नसकेको आरोपबीच बेलायतले मोदी प्रशासनले दशक अघिको दंगालाई समर्थन गरेको निष्कर्ष निकालेको थियो । उक्त दंगामा करिब एकहजार मुश्लिम मारिएका थिए ।
मोदीले बेलायती महारानी एलिजावेथसंग दिवा भोज र बेलायती संसदमा बेलायती समकक्षी डेभिड क्यामरुनसंगै सम्वोधन गर्ने कार्यक्रम छ । मोदी पार्लियामेन्ट स्क्वायरमा रहेको महात्मा गान्धीको शालिक निरिक्षण गर्न समेत पुग्नेछन् । १२ औं शताव्दीका दार्शनिक बस वेशवाराको नयां शालिक अनावरण गरेपछि मोदी शनिवार जि ट्वाइन्टी समिटका लागि अंकारा जांदैछन् ।
भ्रमणका अवसरमा १० विलियन पाउण्ड बराबरको व्यापार सम्झौता हुने समाचार आइरहंदा मोदीले धेरै आलोचना समेत खेप्नुपरेको छ ।
तस्विरः कृष्ण सुवेदी
