बुधबार, मंसिर १७ २०७७ | Wed, December 02, 2020
नेपालको समय: ००:४७ | UK Time: 19:02

सरकारले ९६ औषधिको खुद्रा मूल्य तोकी तत्काल कार्यान्वयनमा ल्याउने

वीनेपाली
२०७२ असार २२ गते १:१८

Simha Durbar

काठमाडौँ, २१ असार । सरकारले विभिन्न ९६ औषधिको खुद्रा मूल्य तोकी तत्काल कार्यान्वयनमा ल्याउने निर्णय गरेको छ ।

औषधि बिक्री वितरणमा आफूखुसी मूल्य तोकिएको र उपभोत्ता मारमा पर्ने गरेको गुनासो बढिरहेका बेला स्वास्थ्य तथा जनसङ्ख्या मन्त्रालयको प्रस्तावमा मन्त्रिपरिषद्को आजको बैठकले बढी प्रचलनमा रहेका १८ र अर्बुद रोग (क्यान्सर)लगायत दीर्घ रोगका लागि प्रयोगमा रहेका ७८ गरी ९६ औषधिको खुद्रा मूल्य तोकेको हो । सो मूल्यसूची हरेक औषधि पसलले राखेर बिक्री गर्नुपर्नेछ ।

सरकारका प्रवक्ता एवम् सूचना तथा सञ्चार मन्त्री डा मीनेन्द्र रिजालले सो निर्णय तत्काल लागू हुने र कार्यान्वयनको जिम्मा स्वास्थ्य मन्त्रालयलाई दिइएको जानकारी दिए ।

बैठकले ललितपुर, सिन्धुपाल्चोक, कास्की र काठमाडौँका विभिन्न स्थानमा स्वर्गवासी राजा वीरेन्द्र, रानी ऐश्वर्यको र उनीहरुको परिवारका नाममा देहावसान हुँदाका बखत रहेका जग्गा नेपाल ट्रष्टका नाममा कायम गर्ने निर्णय गरेको छ । सोसम्बन्धी विस्तृत विवरण पछि सार्वजनिक हुनेछ ।

यस्तै स्ट्यान्डर्ड चार्टर बैंकमा एचएम टेजरीको नाममा रहेका खाता पनि ट्रष्टमा नामसारी गरिने भएको छ । बैठकले ‘सार्वजनिक खरिद (पहिलो संशोधन) ऐन’ २०७२ विधेयक व्यवस्थापिका–संसद्मा पेस गर्न स्वीकृति प्रदान गरेको छ ।

सरकारले नेपाल वायुसेवा निगमको सञ्चालक समितिको अध्यक्षमा संस्कृति, पर्यटन तथा नागरिक उडड्यन मन्त्रालयका सचिव सुरेशमान श्रेष्ठलाई तोकेको छ ।

यस्तै गरिब घर परिवारको प्रारम्भिक सूची सार्वजनिक गरी गुनासो सुनुवाइ गर्ने विषयमा २५ जिल्लाका १२ लाख ४० हजार ३५० घर परिवारमध्ये मापदण्ड र विधि पुगेका तीन लाख ५६ हजार ४१८ घर पहिचान गरिएको मन्त्री रिजालले जानकारी दिनुभयो । केही अपूर्ण विवरण प्राप्त भएकाले एक लाख  ५० हजार ९५८ घर परिवारसहित कूल पाँच लाख ७ हजार ३७६ घरपरिवारको सूचीलाई अन्तिमरुप दिइ सार्वजनिक गरिने भएको छ ।

सर्वाेच्च अदालतका न्यायाधीशलाई एकीकृत आवास निर्माण कार्य पूरा नभइसकेकाले घरभाडा बापत् प्रतिमासिक रु ४० हजार दिने निर्णय भएको छ ।

शिक्षा सेवा आयोगको रिक्त सदस्य पदमा शिक्षा मन्त्रालयका पूर्व सहसचिव ज्ञानी यादवलाई नियुक्त गर्ने निर्णय पनि बैठकले गरेको छ ।

प्रतिक्रिया

सम्बन्धित सामाग्री

फेसबुक