पूर्वब्रिटिस गोर्खाका चिन्ता र गुनासालाई यथाशीघ्र सम्बोधन गर्न बेलायती मन्त्रीसँग परराष्ट्रमन्त्री खनालको आग्रह

लन्डन । नेपालका परराष्ट्रमन्त्री शिशिर खनालले पूर्वब्रिटिस गोर्खाहरुका चिन्ता र गुनासालाई यथाशीघ्र सम्बोधन गर्न बेलायती मन्त्रीसँग आग्रह गर्नुभएको छ ।

नेपालमा भ्रमणमा रहनुभएकी संयुक्त अधिराज्यका इन्डो–प्यासिफिक मन्त्री तथा समानता मन्त्री सीमा मल्होत्राबीच मन्त्रालयमा शुक्रबार भएको भेटवार्तामा मन्त्री खनालले उक्त अनुरोध गर्नुभएको हो ।

मन्त्री मल्होत्राले बेलायती सरकार पूर्वब्रिटिस गोर्खाहरूको समस्या समाधान गर्न सकारात्मक रहेको धारणा व्यक्त गर्नुभएको मन्त्रालयले जनाएको छ ।

भेटमा उहाँहरुबीच नेपाल–बेलायत सम्बन्धका विभिन्न पक्षहरूबारे छलफल गर्दै यी सम्बन्धहरूलाई आधुनिकीकरण गर्न आवश्यक रहेकामा जोड दिइएको मन्त्रालयले जनाएको छ । साथै, लगानी, व्यापार, शिक्षा, पर्यटन, जलवायु कार्य र डिजिटल प्रविधि क्षेत्रहरूमा सहकार्य विस्तार सम्बन्धमा छलफल भएको थियो ।

मन्त्री मल्होत्रा तीन दिने नेपाल भ्रमणका लागि शुक्रबार काठमाडौं पुग्नुभएको हो । भ्रमणका क्रममा उहाँले अन्य सरकारी मन्त्रीहरूसँग पनि भेटघाट गर्ने तथा लुम्बिनी र कपिलवस्तु भ्रमण गर्ने कार्यक्रम छ ।