रसमोर अब फेरिएको छ

लन्डन । नेपालीहरुको उल्लेख्य बसोवास छ बेलायतस्थित रसमोर बरो काउन्सिलमा । विशेष गरि भूपू गोर्खाहरुका लागि त यो दोश्रो घर मानिन्छ । यही काउन्सिलमा केही वर्ष अघि स्थानीयले नेपालीलाई हेर्ने दृष्टिकोण विल्कुल फरक थियो । तत्कालिन मन्त्रीले नै आफ्नो क्षेत्रमा नेपाली बढेर समस्या थपिएको गुनासो गरेका थिए त्यो पनि प्रधानमन्त्री डेभिड क्यामरुनसमक्ष । नेपाली र स्थानीय युवामाझ कुटाकुट उस्तै । तर, समय बदलिएको छ । अहिले नेपाली र ब्रिटिश समुदाय मिलेका छन्, सौहार्द वातावरण छ । यसपटक नेपालको भूकम्प पीडितलाई सहयाग गर्ने क्रममा त रसमोरले झन् ठूलो उदारता देखाएको छ ।

भूकम्प पीडितलाई रसमोर कम्युनिटीको स्वतस्फूर्त सहयोग देखेर दंग छन् ग्रेटर रसमोर नेपलिज कम्युनिटीका अध्यक्ष मेजर रि. टिकेन्द्रदल देवान । ‘रसमोरका अल्डरसट र फार्नबोरोबाट पाएको सहयोग देखेर हामी आश्चर्यचकित छौं’, देवान भन्छन्, ‘आर्थिक सहयोग र राहत सामाग्री थेग्न नसकिने गरि प्राप्त भयो ।’
नेपाली बसाईं सरेको शुरु शुरुताका रसमोरमा बेलायती नेपालीबीचको तनाव देखेर देवान आफैं चकित थिए । ‘तर, अहिले नेपालीलाई सहर्षका साथ स्वीकारिएको छ’, देवानको अनुभव छ ।
अध्यक्ष देवानले १०, १२ वटा रोटरी क्लवहरु एक साथ भएर अबको ६ महिनाभित्र अरु तीव्र ढंगले कोष अभिवृद्धि गर्नेबारे सल्लाह भएको समेत जनाए ।

यसपटक रसमोरवासी बेलायती नागरिक र विभिन्न संघसंस्थाले दिल खोलेर सहयोग गरेका छन् । रसमोर रोटरी क्लव आवद्ध रोटरियनहरुले विपत्ति लगत्तै अल्डरसोट, 
फ्लीट, फार्नबोरो र क्याम्बर्लीबाट २२ हजार पाउण्ड चन्दा संकलन गरे । क्लवका इन्टरनेशनल एण्ड फाउण्डेशन चियरमेन पिटर मेल्ड्रमले विपतका बेला 
रोटरीले जहिले पनि तत्काल मानवीय सहायता गर्ने गरेको उल्लेख गर्दै ब्ल्याकवाटर भ्यालीका रोटरियनहरुको नेपाली समुदायसंग प्रगाढ सम्वन्ध रहेको जनाएका छन् ।
यसअलवा रसमोरबाट अग्नी नियन्त्रकहरुको टोली नेपाल गइ उद्दारमा सहभागी भएर फर्किसकेको छ । स्थानीय टेस्को, ग्रेन्जर, अल्डरसोट टाउन एफसी लगायत अन्य कयौं समुदाय र व्यक्तिले समेत पीडितका लागि आर्थिक सहयोग प्रदान गरेका छन् ।