मंगलबार, कार्तिक ११ २०७७ | Tue, October 27, 2020
नेपालको समय: ०५:३९ | UK Time: 23:54

बेलायतका नेपाली रेष्टुरेन्टहरुले एकदिनको कमाइ भुकम्प पीडितलाई दिने

वीनेपाली
२०७२ वैशाख २७ गते २२:०३

NCA charity photo

लण्डन । युकेस्थित नेपाली रेस्टुरेन्टहरुले नेपालका भुकम्प पीडितहरुलाई एक दिनको कमाइ सहयोग स्वरुप उपलब्ध गराउने भएका छन् ।
युकेका नेपाली रेष्टुरेन्ट व्यवसायीहरुको संगठन नेपलिज क्याटरिंग एसोसिएसन युकेले आफ्ना सदस्य रेस्टुरेन्टहरुलाई एक दिन च्यारिटी आयोजना गरी सोबाट आर्जन हुने कमाइ नेपालका भुकम्प पीडितलाई दिन आहृवान गरेको छ ।
नेपालमा भुकम्पका कारण हजारौँले ज्यान गुमाइसकेको, हजारौँ अंगभंग भएको र लाखौँ घरबारविहीन भएको उल्लेख गर्दै एसोसिएसनले युकेजस्तो संभ्रान्त र विकसित देशबाट गरिएको सानो सहयोग पनि देशका लागि ठूलो हुने निस्कर्ष निकालेको छ ।
एसोसिएसनका अध्यक्ष विजय थापाका अनुसार अहिलेसम्म करिब एक दर्जन रेस्टुरेन्टले च्यारिटी कार्यक्रमको आयोजना गरिसकेका छन् । ती कार्यक्रमहरुमा प्रति रेस्टुरेन्ट करिब ५ हजार पाउण्ड संकलन भएको बताइएको छ ।
अध्यक्ष थापाको मुनाल तन्दुरी रेष्टुरेन्टले आयोजना गरेको च्यारिटीमा करिब ५ हजार पाउण्ड संकलन भएको जानकारी उनले दिए भने महासचिव किशोर सापकोटाको गोरखा प्यालेस फोल्क्स्टोनमा करिब ६ हजार पाउण्ड संकलन भएको छ ।
अहिलेसम्म मुनाल तन्दुरी, मोन्टिज इलिंग, गोरखा प्यालेस फोल्क्सटोन, गोरखा प्यालेस फार्नब्रो आदिले च्यारिटी कार्यक्रम आयोजना गरिसकेका छन् भने थुप्रै रेस्टुरेन्टहरु च्यारिटी कार्यक्रम आयोजना गर्दैछन् ।
अध्यक्ष थापाका अनुसार रेस्टुरेन्टहरुलाई च्यारिटी आयोजना गर्ने बारेमा सरसल्लाह र अनुभव आदानप्रदान गर्न एसोसिएसनले एक टोली  बनाएको छ ।
पूर्व अध्यक्ष ध्रुव केसी, अध्यक्ष विजय थापा, उपाध्यक्ष सुरेन्द्र श्रेष्ठ, महासचिव किशोर सापकोटा, सचिव ओजेश डंगोल र कोषाध्यक्ष दौलत राई सो टोलीमा रहेका छन् ।
रेस्टुरेन्ट व्यवसाय युकेमा नेपालीहरुको मुख्य व्यवसाय हो । एसोसिएसनका अनुसार करिब ३०० नेपाली रेस्टुरेन्ट युकेमा रहेका छन् । तीमध्ये एक तिहाइले मात्र एक दिनको कमाइ भुकम्प पीडितलाई दिने हो भने ५० करोडभन्दा बढी नेपाली रुपियाँ उठ्न सक्छ ।
“सबै नेपाली रेस्टुरेन्ट सञ्चालकहरुले एक दिनको कमाइ नेपालका भुकम्प पीडितको सहयोगार्थ दिने हो भने धेरै ठूलो सहयोग हुनसक्ने हामीले देखेका छौँ” अध्यक्ष थापाले भने ।
रेस्टुरेन्ट सञ्चालकहरुका अनुसार अन्तर्राष्ट्रिय मिडियाहरुले व्यापक मात्रमा प्रचारप्रसार गरिदिइसकेकाले ग्राहकहरुलाई च्यारिटीका बारेमा धेरै भनिरहनु नपर्ने र कतिपय ग्राहकहरुले च्यारिटी गर्नका लागि पहिल्यै सुझाव समेत दिएको उनले बताए ।

प्रतिक्रिया

सम्बन्धित सामाग्री

फेसबुक