काठमाडौं। नयाँ संविधानका अन्तर्वस्तुका विवादित विषयमा प्रश्न तयार पार्न संविधानसभाद्वारा गठित प्रस्ताव निर्माण समितिले सात शीर्षकमा प्रश्न तयार पार्ने तयारी गरेको छ। समितिले प्रस्तावना, मौलिक हक, संवैधानिक निकाय, न्याय प्रणाली, शासकीय स्वरुप, व्यवस्थापिका स्वरुप र राज्य पुनःसंरचना शीर्षकअन्तर्गत विवादित विषयका प्रश्न तयार गर्नेछ ।
सोमबार समितिको बैठकले नेकपा एमालेका प्रमुख सचेतक अग्नि खरेलको संयोजकत्वमा ९ सदस्यीय प्रश्न निर्माण उपसमिति गठन गरी तयारी अघि बढाएको हो ।
उपसमिति संयोजक खरेलले निक्र्योल समितिले सहमति नभएको भनी संवैधानिक राजनीतिक संवाद तथा सहमति समितिमा पठाएका विषय र संवाद समितिमा विभिन्न राजनीतिक दलबाट आएका अवधारणा समेटेर प्रश्न तयार पारिने जानकारी दिए । सभासदले स्पष्टसँग बुझ्ने गरी प्रश्न तयार पार्ने उनले जनाए।
९ सदस्यीय उपसमितिमा नेकपा मालेका सिपी मैनाली, नेपाली कांग्रेसका रमेश लेखक, राधेश्याम अधिकारी र उषा गुरुङ, नेकपा एमालेका श्रीमाया थकाली, कृष्णभक्त पोखरेल, अखण्ड नेपाल पार्टीका कुमार खड्का र स्वतन्त्र सभासद मोहम्मद कमाल मुसलमान छन् ।
