भूकम्प पीडितलाई बेलायतका नेपाली सेफहरुको सहयोग

लण्डन । बेलायतमा रहेका नेपाली सेफहरुको संस्था नेप्लिज सेफ एसोसिएसन यूकेले नेपालका भूकम्प पीडितलाई दुई लाख ७५ हजार रुपैंया सहयोग गरेको छ  ।

एसोसिएसन अध्यक्ष कृष्ण तिमल्सिना सहितका पदाधिकारीहरुले बुधबार लण्डनस्थित कार्यवहाक नेपाली राजदूत तेजबहादुर क्षेत्रीलाई उक्त सहयोग रकम हस्तान्तरण गरेका हुन् । एसोसिएसनका उपाध्यक्ष दधि आचार्यका अनुसार उक्त सहयोग रकम प्रधानमन्त्री राहत तथा उद्दार कोषमा जम्मा हुनेछ ।

बेलायतमा कार्यरत नेपाली सेफ तथा शुभचिन्तकहरुबाट उक्त रकम संकलन गरिएको एसोसिएसनले जनाएको छ ।

बेलायतलाई कर्मथलो बनाएका सेफहरुलाई एकत्रित गर्न तथा उनीहरुको हक अधिकार सुनिश्चित गराउन सन् २०१२ मा स्थापित सेफ एसोसिएसन यूकेले स्थापना कालदेखि नै नेपालका हरेक विपत्तिमा सक्दो सहयोग पुर्याउंदै आइरहेको छ ।

उक्त अवसरमा कार्यवहाक राजदूत क्षेत्रीले सेफ एसोसिएसन यूकेले प्रशंसनीय कामहरु गरेको स्मरण गर्दै उक्त रकम तत्काल नेपाल पठाउने बताएका थिए । बेलायतमा सेफहरुको पेशा अत्यन्तै सम्मानजनक रहेको बताउंदै क्षेत्रीले सामाजिक काममा अझै बढि सक्रिय भएर लाग्न आग्रह गरे । अहिलेको अवस्थामा गोर्खा पछि बेलायतमा सेफ पेशा बढि सुरक्षित रहेको क्षेत्रीले बताए ।

एसोसिएसन अध्यक्ष तिमल्सिनाले देश रोइरहेको बेला सानो भएपनि सहयोग गर्न पाउंदा आफूहरुलाई खुशी लागेको बताए । उनले रकम संकलनमा प्रत्यक्ष अप्रत्यक्ष सहयोग पुर्याउने सेफहरुप्रति आभार प्रकट गरेका थिए । बेलायतको टाढा टाढा रहेर पनि मातृभूमिको सेवामा सहयोग गर्ने सेफहरुलाई धन्यवाद दिंदै उनले आगामी दिनमा पनि सहयोग गर्न आव्हान गरे ।

एसोसिएसनले संकलन गरेको बांकी रकम सेफहरु आफैं उपस्थित भएर भूकम्पबाट क्षतिग्रस्त स्कुलको पुननिर्माणमा खर्च गर्ने जनाएको छ । अध्यक्ष तिमल्सिनाका अनुसार, छिट्टै बस्ने कार्यसमितिको बैठकमा स्कुल पुननिर्माणबारे स्पष्ट योजना सार्वजनिक गरिने छ ।

सहयोग रकम हस्तान्तरणका अवसरमा एसोसिएसन अध्यक्ष तिमल्सिना, उपाध्यक्ष आचार्य, सदस्यहरु ठाकुर ढुंगाना, धर्म चापागाईं, रामु कंडेल, रामसिंह थापा, दिपक आचार्य लगायत सहभागी थिए ।