धादिङ नुवाकोट समाज यूकेको समर भेटघाट कार्यक्रम सम्पन्न

लन्डन । धादिङ नुवाकोट समाज यूकेको समर भेटघाट कार्यक्रम सम्पन्न भएको छ ।

नेपालको बागमती प्रदेशका मुख्यमन्त्री बहादुरसिंह लामाको प्रमुख आतिथ्यमा हन्स्लो लन्डनमा भेटघाट कार्यक्रम भएको हो । प्रमुख अतिथि लामा र अध्यक्ष पाख्रिनले संयुक्त रुपमा दीप प्रज्वलन गरी कार्यक्रम उद्घाटन गर्नुएको थियो ।

मुख्यमन्त्री लामाले बेलायतमा बसोबास गर्ने धादिङ र नुवाकोटवासी सबैलाई गोलबद्ध गरेर दुःख सुःखमा साथ दिने संस्थाको काम प्रशंसनीय रहेको बताउनुभयो । समाजका अध्यक्ष धनबहादुर तामाङ (पाख्रिन) ले मुख्यमन्त्रीको उपस्थितिले सबैलाई गौरव तुल्याएको बताउनुभयो ।

कार्यक्रममा स्वर्ण पदक विजेता अन्तर्राष्ट्रिय मार्सल आर्टस खेलाडी सरिना घलेलाई सम्मान गरिएको थियो । मुख्यमन्त्री बहादुरसिंह लामा, समाजका अध्यक्ष धन पाख्रिन, एनआरएनए यूके अध्यक्ष प्रेम गाहामगर लगायतले सम्मान प्रदान गर्नुभएको हो ।

त्यस्तै बेलायती विश्वविद्यालयमा उत्कृष्ट नतिजा ल्याउने विद्यार्थीहरुलाई अवार्ड, नेपालबाट आएका राष्ट्रिय कलाकारहरु देवी घर्ती, पवित्रा गुरुङ र लक्ष्मी खड्का, यूकेका कुमार योन्जनसहित स्थानीय कलाकारहरु तथा विजेता फुटबल खेलाडीलाई सम्मान तथा प्रमाणपत्र प्रदान गरिएको समाजका अध्यक्ष तामाङले बताउनुभयो ।

उपाध्यक्ष मोतिमान बज्राचार्यले स्वागत मन्तव्य र उपाध्यक्ष गोल बहादुर तामाङले ‘हेल्थ एण्ड सेफ्टी’ जानकारी गराएको कार्यक्रम महासचिव बुद्धिबहादुर तामाङले सञ्चालन गर्नुभएको थियो ।

सांस्कृतिक सचिव कृष्ण पाख्रिनले सञ्चालन गर्नुभएको थियो । कार्यक्रममा लोकदोहोरी गायिका देवी घर्तीमगर, पवित्रा गुरुङ र लक्ष्मी खड्का एवं लन्डनवासी गायक कुमार योन्जनले विभिन्न गीत प्रस्तुत गर्नुभएको थियो । सोनी गुरुङ, सविना गुरुङ, सुमिना तामाङ, इशानी घले, प्रशंसा गुरुङ र स्मृति थापाले आकर्षक नृत्य प्रस्तुत गर्नुभएको थियो ।

सोही दिन भएको डीएनएस फुटबल कप-२०२५ मा तामाङ समाज यूके च्याम्पियन बन्यो । विजेता टिमलाई ३०० पाउण्ड नगद, मेडल र प्रमाणपत्र प्रदान गरियो । प्रतियोगितामा नेपलिज ब्रर्दस दोस्रो र बीजीएफसी तेस्रो भए ।

कार्यक्रममा राफल ड्र पनि खेलाइएको थियो । कार्यक्रममा बेलायतमा सक्रिय विभिन्न संस्थाका अध्यक्ष तथा प्रतिनिधि, धादिङ तथा नुवाकोटबाट बेलायत आएकाहरुको बाक्लो उपस्थिति थियो ।