धराने भेला २७ जुनमा

 

 

लन्डन । बेलायतमा बसोवास गरिरहेका धरानेहरुको वार्षिक भेला यही जुन २७, शनिवार हुने भएको छ ।

फेल्थाम कम्युनिटी कलेज हलमा बिहान ११ देखि राती १० बजेसम्म तय गरिएको उक्त भेलामा विशेष आकर्षण हुनेछन् गायक दीप श्रेष्ठ । रोयल अल्बर्ट हलमा २८ जुनमा हुने कार्यक्रमका लागि तेश्रो साता बेलायत आउन लागेका गायक श्रेष्ठलाई अतिथी सत्कार दिने समाजको योजना छ । कार्यक्रममा नेपाली दूतावाससहित अन्य विभिन्न संघसंस्थाका पदाधिकारीको समेत उपस्थिति रहने छ ।

समाजका अध्यक्ष उमेश मोक्तानले बेलायतवासी धरानेबीच पुनर्मिलन, सांस्कृतिक मनोरन्जनसहित यसपटकको कार्यक्रम धरान प्रवेशद्धार निर्माणका लागि आर्थिक 
संकलनमा केन्द्रित हुने जनाए । समाजले धरानमा झण्डै ८० लाख रुपैयां लगानीमा प्रवेशद्धार (वेल्कम गेट) बनाउने महत्वकांक्षी योजना अघि सारेको छ । समाजले भेलामा सहभागी हुन सबै धरानेहरुमा आग्रह समेत गरेको छ ।