अल्डरसटमा तमु कलाकार सांस्कृतिक मञ्च यूकेको ल्होछार/ल्होसार

लन्डन । तमु कलाकार सांस्कृतिक मञ्च यूकेको यस वर्षको ल्होछार/ल्होसार कार्यक्रम सम्पन्न भएको छ ।

मञ्चले गत वर्षहरूमा जस्तै शनिबार ७ डिसेम्बर २०२४ मा अल्डरसटस्थित एम्पायर हलमा ल्होछार/ल्होसार शुभकामना आदानप्रदान कार्यक्रम भव्य रूपमा सम्पन्न गरेको जनाएको छ । संस्थाका अध्यक्ष पदम गुरूङको सभापतित्वमा भएको कार्यक्रममा बेलायतस्थित तमु संघसंस्थाका अग्रजहरू र कला संस्कार संस्कृतिका पारखीहरूको उपस्थिति रहेको थियो ।

कार्यक्रममा तमु धीं यूकेका अध्यक्ष हरि गुरूङ, प्रमुख सल्लाहकार एकेन्द्र तमु, संस्थापक अध्यक्ष सूर्य गुरूङ, लमजुङ समाज यूकेका अध्यक्ष दलबहादुर गुरूङलगायत उपस्थित सबैले आउँदै गरेको सप्ह्री ल्होको शुभकामना दिनुका साथै चौथो रोधी साँझको पनि सफलताको कामना गर्नुभएको थियो ।

शुभकामना आदानप्रदानपश्चात् संस्थापक अध्यक्षबाट १५ मार्च २०२५ मा हुन गइरहेको रोधी साँझको टिकट वितरण गर्नुभएको थियो । त्यसै अवसरमा चाईना ओरियन्टल अल्डरसटका प्रबन्ध निर्देशक तथा तमु धीं यूकेका उपाध्यक्ष कमल गुरूङ र पानस रेस्टुरेन्टका संचालक तथा तमु धीं यूकेका सचिव बिमल गुरूङबाट रोधी साँझका लागि आर्थिक सहयोग दिएको जानकारी गराइएको छ ।

सचिव सुशील गुरूङले संचालन गरेको कार्यक्रमको अन्तमा अध्यक्ष पदम गुरुङबाट संस्थाको छोटो अपडेट र उपस्थित सबैलाई धन्यवाद र आभार ब्यक्त गर्दै औपचारिक कार्यक्रमको समापन गर्नुभएको थियो ।

कार्यक्रमको दोस्रो चरणमा मिठोमिठो गफगाफ गर्दै एम्पायर हलबाट तयार पारिएको स्योकै (भोज) खाँदै तमु क्वोए (गुरूङ गीतहरू) गाउँदै रमाइलो गरिएको थियो ।