२५ वर्षीय नेपाली युवा म्याकडोनाल्ड्सको उत्कृष्ट म्यानेजर

लन्डन । २५ वर्षीय एक नेपाली युवा प्रमेशराज गिरी अन्तर्राष्ट्रिय फास्टफुड चेन म्याकडोनाल्ड्सको दि रे क्रक अवार्डस् (म्यानेजर अफ दि इयर २०१५) बाट सम्मानित भएका छन् । म्याकडोनाल्ड्स यूकेका करिब १४ सय म्यानेजरमध्ये गिरी १२ जनाभित्र परि उक्त अवार्ड जित्न सफल भएका हुन् । युरोपभरका म्यानेजरमध्येबाट उनी टप वान प्रतिशतभित्र पर्न सफल भए । रेष्टुरेन्टको व्यापार वृद्धिमा गरेको योगदानका आधारमा म्याकले वर्षेनी उक्त प्रतिष्ठित अवार्ड प्रदान गर्दै आएको छ । यसपटक युरोपको चेक रिपव्लिक राजधानी प्रागस्थित कोरिनथिया होटलमा अवार्ड समारोह सम्पन्न भएको थियो । उक्त अवार्ड अमेरिकी फ्रेन्चाइज कम्पनी म्याकडोनाल्डका संस्थापक रे क्रकको नाममा स्थापना गरिएको हो ।

‘मलाई त्यतिका मध्येबाट छानिन्छु भन्ने कल्पना समेत थिएन’, वीनेपालीसंग खुशी साट्दै उनले भने, ‘म ज्यादै खुशी छु । परिश्रम गरे त्यसको फल ढिलो चांडो पाइने रहेछ ।’ सफलता पछाडि इमान्दार र जागिरप्रति दत्तचित्त भएर लाग्दाको परिणाम ठान्छन् उनी ।

अहिले उलवीच डकयार्ड शाखामा विजनेश म्यानेजरको जिम्मेवारी सम्हालिरहेका गिरीले म्याकमा काम शुरु गरेको ६ वर्ष अवधिमा उक्त सफलता हांसिल गरेका हुन् । शुरुमा क्रु मेम्बरका रुपमा छिरेका उनी क्रु ट्रेनर, सिफ्ट म्यानेजर, सेकेन्ड असिस्टेन्ट विजनेश म्यानेजर, फष्ट विजनेश असिस्टेन्ट म्यानेजर हुंदै हाल विजनेश म्यानेजर छन् ।

भक्तपुर निवासी गिरी डन बस्कोमा प्लस टु सकेलगत्तै अध्ययनका लागि यूके आएका थिए । बेलायत आउंदा उनको उमेर १९ मात्र थियो । उनले यहां आएर शुरुदेखिनै म्याकमा आवद्ध भइ अध्ययनलाई एकसाथ अगाडि बढाएका थिए । विजनेश म्यानेजमेन्टको पढाइले पनि उनलाई कार्यक्षेत्रमा सघाएको थियो । अवार्ड पाएलगत्तै आफूलाई टेस्को, सेन्सबरी जस्ता स्टोरबाट राम्रो अफर आएको गिरीले बताए । गिरीले म्याकडोनाल्ड चेनलाई नेपालमा लैजाने सम्भाव्यताबारे पनि अध्ययन गर्ने जनाए ।