बेलायत छिर्ने आप्रवासीको सङ्ख्या १० हजारभन्दा बढी

लन्डन । सन् २०२४ को पहिलो पाँच महिनामा १० हजारभन्दा बढी आप्रवासीहरू साना डुङ्गामार्फत समुद्र पार गरेर बेलायत पुगेका बेलायतको सरकारी तथ्याङ्कले देखाएको छ ।
कन्जरभेटिभ पार्टीका नेता तथा प्रधानमन्त्री ऋषि सुनकले प्रधानमन्त्रीमा चुनिएलगत्तै गरेको पाँच प्रतिवद्धतामा आप्रवासी नियन्त्रण पनि एक थियो । सरकारको कठोर नीतिका वावजूद समुद्री मार्गबाट बेलायत भित्रिने आप्रवासीहरूको संख्या भने गत वर्षभन्दा बढेको छ । बेलायत गृह मन्त्रालयको तथ्याङ्कअनुसार सन् २०२४ सम्म समुद्री बाटो भएर अवैधरूपमा बेलायतको विभिन्न भूभागमा प्रवेश गर्ने व्यक्तिको सङ्ख्या १० हजार १७० पुगेको छ । यो सङ्ख्या गत वर्षको यही अवधिमा रेकर्ड गरिएको सङ्ख्याको तुलनामा ३५ प्रतिशतले बढी हो ।
सन् २०२४ को पहिलो पाँच महिनामा समुद्री मार्गबाट बेलायत आउने कागजविहीन आप्रवासीको सङ्ख्या यसअघिको तुलनामा उच्च रहेको थियो ।
सुनकले जुलाई ४ को लागि आम निर्वाचनको आह्वान गर्नुभएको अवस्थामा सार्वजनिक यस तथ्याङ्कले आप्रवासी समस्या यो निर्वाचन अघि नै ठूलो मुद्दाको रूपमा देखिएको छ ।
मुख्य विपक्षी लेबर पार्टीले हजारौं शरणार्थीहरूलाई जबरजस्ती रुवान्डामा निर्वासित गर्ने उहाँको प्रमुख योजना मतदानको दिन अघि सुरु नहुने र यो विवादास्पद योजना खारेज गर्ने प्रतिवद्धता गरेको छ ।
लेबरले आप्रवासीको स्तर धेरै उच्च रहेको बताउँदै सानो डुङ्गामा अवैध बाटोबाट यात्रा गरी लाभ उठाउने तस्कर तथा अन्य गिरोहहरूमाथि कारबाही गर्ने बताएको छ ।