हरि बुढामगरले सातै महादेशका अग्ला हिमाल चढ्ने

लण्डन । अफगानिस्तानको लडाइँमा दुवै गोडा गुमाएका पूर्व गोरखा सैनिक हरि बुढामगरले सातै महादेशका सबैभन्दा अग्ला हिमाल आरोहण गर्ने भएका छन् ।

कृतिम गोडाका भरमा गतवर्ष विश्वको सर्वोच्च शिखर सगरमाथा आरोहण गरेर विश्व कीर्तिमान कायम गरेका बुढामगरले अपाङ्गताका बारेमा जनचेतना लगाउन र मानिसहरूलाई आफ्नो सपना पूरा गर्न उत्प्रेरणा जगाउन ती हिमाल आरोहण गर्ने भएका हुन् ।

रोल्पा पुर्ख्यौली घर भएका बुढा मगर अहिले बेलायतमा परिवारका साथ बसोबास गर्ने गरेका छन् ।

सन् २०१० मा बेलायती सेनामा कार्यरत रहेका बेला अफगानिस्तानमा विष्फोटमा परी उनले दुवै खुट्टा गुमाएका थिए । त्यसयता उनी घुँडाभन्दा माथिदेखि नै कृतिम गोडा लाएर हिँड्ने गरेका छन् ।

उनी जब घाइते भए त्यतिबला उनलाई लाग्थ्यो – ‘उनको जीवन सकियो । जीवनभर ह्वीचेयरमा अरूको सहारामा बाँच्नुपर्छ । एउटा कोठामा बन्दी हुनुपर्छ ।’ किनकी उनले हुर्कँदा त्यस्तै देखेका र सुनेका थिए । अपाङ्ग भएपछि के गर्न सकिन्छ भन्ने बारेमा उनलाई केही थाहा थिएन । अघिल्लो जुनीमा गरेको खराब कार्यका कारण यस्तो भएको होला भन्ने सोच्दासोच्दै उनले दुई वर्ष उनकै शब्दमा ‘खेर’ फाले।

एक्काइसौँ शताब्दीमा पनि अपाङ्गताका बारेमा धेरै नै गलत बुझाइ रहेको र अपाङ्गता भएकाहरूले आफूलाई धर्तीको भार ठान्ने गरेको उनले पाए । मानिस अपाङ्ग जुनसुकै बेला हुनसक्ने र आफू पनि ३१ वर्षसम्म ठीकठाक नै रहेको उनी स्मरण गर्छन् ।

आफूले हिमाल चढ्दैमा अपाङगताका बारेमा पर्याप्त जनजागरण ल्याउन नसकिने उल्लेख गर्दै उनी अपाङ्गता भएका मानिसहरूलाई आफूलाई मनपर्ने क्षेत्रमा लाग्न आह्वान गर्छन् । ‘अपाङ्गता हाम्रो कमजोरी हुन सक्ला तर त्यसको मतलब यो होइन कि हामी केही गर्न सक्दैनौँ’, उनी भन्छन्, ‘हामी गरिबी, दयाको पात्र र राज्यले दिएको सहायतामा बाँच्ने मात्र होइन खुशी, सफल र अर्थपूर्ण जीवन पनि बाँच्न सक्छौँ ।’  

उनले सगरमाथा आरोहण अघि नै युरोपको माउन्ट ब्लाङ्क र अफ्रिकाको माउन्ट किलीमन्जारो चढिसकेका छन् । उनी जुनमा उत्तरी अमेरिकाको अग्लो हिमाल माउण्ट म्याकिन्ली चढ्न प्रस्थान गर्दैछन् ।

सो हिमाल आरोहण गरेपछि उनीसित अन्टार्कटिका, दक्षिण अमेरिका र ओसिनियाको हिमाल मात्र चढ्न बाँकी रहने छ ।

आफ्नो आरोहणमा सघाउन उनले अपील गरेका छन् ।