गोर्खा भर्तीको दुईसय वर्षगाँठमा रानीसहित शाही सदस्यहरु

लन्डन । ब्रिटिश सेनामा गोर्खा भर्तीको दुई सय वर्ष गांठका अवसरमा हुने विशेष कार्यक्रममा बेलायती महारानी सहभागी हुने तय भएको छ । रोयल हस्पिटल चेल्सीमा आगामी ९ जुनमा हुने ‘गोर्खा २०० पेजेन्ट’ मा महारानी एलिजावेथ द्धितियासहित शाही परिवारका सदस्यहरुको उपस्थिति हुने भएको हो । कार्यक्रमका अवसरमा महारानी र अन्य शाही सदस्यहरुले आयोजकसहित सेवारत गोर्खा र भेट्रानहरुलाई भेट्ने कार्यक्रम छ ।

दि गोर्खा वेलफेयर ट्रष्टको सहयोगार्थ हुन लागेको उक्त इभेन्टमा डुक अफ एडिनबरा प्रिन्स फिलिप, द प्रिन्स अफ वेल्स् चार्ल्स र प्रिन्स ह्यारीको समेत सहभागिता हुने कार्यक्रम छ । गोर्खा वेलफेयर ट्रष्टले नेपालमा रहेका भूतपूर्व गोर्खाहरुको आर्थिक तथा औषधोपचारमा सहयोग गर्दैै आएको छ ।

ब्रिटिश शाही परिवारका समाचारमा विश्वसनीय ठानिने रोयल सेन्ट्रलका अनुसार, त्यसदिन गोर्खा इतिहास स्मरण र ब्रिगेड अफ गोर्खाज् व्याण्डको प्रस्तुति रहनेछ । उक्त अवसरमा महिनादिन अघि नेपालमा आएको विनाशकारी भूकम्पमा दिवंगत हुनेहरुप्रति श्रद्धाञ्जलि अर्पण समेत गरिनेछ । रानी र प्रिन्स चार्ल्सले डिजास्टर 
इमर्जेन्सी कमिटी (डिइसी) मार्फत नेपालका भूकम्प पीडितलाई व्यक्तिगत सहयोग समेत गरिसकेका छन् ।

गोर्खाहरुप्रति शाही परिवारको बेग्लै सद्भाव छ । प्रिन्स चार्ल्सले सन् २०१२, अप्रिलमा सर जोन मुर ब्यारेक फोक्सटोनस्थित दि रोयल गोर्खा राइफल्स् रेजिमेन्ट भ्रमण गरेका थिए । प्रिन्स चार्ल्स दि रोयल गोर्खा राइफल्स्का कर्णेल इन चिफ एवं गोर्खा सम्मिलित जि २०० सगरमाथा आरोहण दल, दि गोर्खा वेलफेयर ट्रष्ट र दि ब्रिटेन नेपाल मेडिकल ट्रष्टका संरक्षक समेत हुन् । उता, प्रिन्स ह्यारी दि रोयल गोर्खा राइफल्स् फष्ट बटालियनमा संलग्न रहेर गोर्खाहरुका साथ अफगानिस्तान युद्धमा उत्रिसकेका छन् ।

यसै वर्ष ब्रिटिश सेनामा गोर्खा भर्तीको दुई सय वर्ष पुग्दैछ । यस अवसरमा बेलायत र नेपालमा विभिन्न कार्यक्रम तय भएका छन् । दुई शताव्दीयता गोर्खाहरुले ब्रिटिश फोर्ससंग प्रमुख युद्धमोर्चामा संगै लड्दै आएका छन् ।

प्रथम र दोश्रो विश्वयुद्धमा ४० हजार बढि गोर्खाले ज्यान गुमाइसकेको विश्वास छ । हालसम्म १३ गोर्खाहरुले ब्रिटिश सेनाको सर्वोच्च पदक भिक्टोरिया क्रस (भिसी) पाइसकेका छन् ।