फोनिज युके पत्रकारिता पुरस्कार चेपाङलाई, सम्मान राईलाई

लण्डन । नेपाल आदिवासी जनजाति पत्रकार महासंघ (फोनिज) युकेले सन् २०२३ को फोनिज युके पत्रकारिता पुरस्कार पत्रकार संगीता चेपाङलाई र सम्मान पत्रकार दिपेन राईलाई प्रदान गर्ने भएको छ ।
पुरस्कार छनौट समितिका संयोजक तथा फोनिज युकेका प्रमुख सल्लाहकार मेजर रिटायर्ड सोनामछिरिङ शेर्पाको संयोजकत्वमा यही जनवरी २६ मा बसेको छनौट समितिको बैठकले सो निर्णय गरेको हो ।
छनौट समितिमा निवर्तमान अध्यक्ष गोमा राना, पूर्व अध्यक्ष प्रमिला लाबुङ राई र वर्तमान अध्यक्ष बम थापा सूर्यवंशीमगर सदस्य रहेका थिए ।
पुरस्कार पाउनुहुने चेपाङ इच्छाकामना एफएम चितवनमा कार्यक्रम प्रस्तोता र समाचारवाचिका हुनुहुन्छ भने दिपेन राई झापाबाट प्रकाशन हुने यलम्बर टाइम्स र लोकतन्त्र दैनिकका सम्पादक तथा प्रकाशक हुनुहुन्छ ।
फोनिज युकेका अध्यक्षले उहाँहरुलाई नेपालमा एक समारोहबीच पुरस्कृत गर्नका लागि समन्वय गर्ने बताइएको छ ।
फोनिज युकेले विगत केही वर्षदेखि हरेक वर्ष नेपालका एक अग्रज जनजाति पत्रकारलाई सम्मान र युवा पत्रकारलाई पुरस्कार दिँदै आइरहेको छ ।
पुरस्कार र सम्मानको राशी २५/२५ हजार रुपियाँ र सम्मानपत्र रहेको छ ।
यसअघि सो पुरस्कार र सम्मान गोपाल छाङ्छा राई, रामविकास चौधरी, गणेशमान गुरुङ, मिलन लिम्बु, शान्ति गुरुङ, सन्त गाहामगर, राजेश चाम्लिङ, टेकराज थामी, टीकाराम प्रधान, निलिफा सुब्बा, रमिता लामा र नृपेन्द्रलाल श्रेष्ठलाई प्रदान गरिसकिएको छ ।