‘च्यारिटी किङ’ ले उठाए १४ लाख रुपैयां

लन्डन । बेलायतको नेपाली समुदायमा उनलाई ‘च्यारिटी किङ’ ठान्नेहरु अत्यधिक  छन् । कारण, च्यारिटी उनको दिनचर्या भित्र छ । गत वर्ष उनकै संयोजनमा बेलायतबाट हेल्प नेपाल नेटवर्कका लागि एक करोड २० लाख रुपैयां संकलन भयो ।
गोर्खा प्यालेस रेष्टुरेन्ट फार्नबोरोका सञ्चालक सूर्य गुरुङले विगत दशवर्ष  (सन् २००४) यता आफ्नो रेष्टुरेन्टमा प्रत्येक वर्ष च्यारिटी कार्यक्रम गरेर नेपाल र बेलायती समुदायका लागि आर्थिक सहयोग गर्दै आएका  छन् ।

सन् २००४ मा पोखरा रंगशाला घेर्न पर्खाल निर्माणका लागि ५० लाख रुपैयां उठाएर पठाएका गुरुङको त्यसयताको निरन्तर समाजसेवाबाट प्रभावित हुने अत्यधिक छन् । स्थानीय च्यारिटी कार्यक्रममा बोलाउंदा आम व्यवसायी जस्तो उनको न कहिल्यै बैठक हुन्छ, न पारिवारिक कमिटमेन्ट । कार्यक्रममा सहभागी भइहाल्छन् उनी ।

यसपटक उनको दयाभाव फेरि जागृत भएको छ । भूकम्प लगत्तै उनको मन आम नेपाली जस्तै विक्षिप्त बन्यो । अरु बेला त सहयोग भनेपछि आफ्नो प्राण दिन तयार रहने एनआरएनए यूके पूर्व अध्यक्ष गुरुङले अहिलेको यो विपत्तिमा चुप लाग्ने त कुरै थिएन । तिनै पीडितका लागि आर्थिक सहयोग जुटाउन उनले आफ्नै रेष्टुरेन्टमा च्यारिटी डिनर कार्यक्रम गरे २५ मे सोमबार । गुरुङले शतप्रतिशत विदेश सहभागी उक्त कार्यक्रमबाट संकलित रकम (मे अन्तिमसम्म संकलन जारी रहेकाले हिसाब बांकी) र आफ्नो व्यक्तिगत गरि १४ लाख रुपैयां दिने घोषणा गरेका छन् । च्यारिटीमा उठेको रकम सतप्रतिशत पीडितलाई दिने उनको अठोट छ ।

च्यारिटीमा वर्तमान सांसद तथा पूर्व मन्त्री जेराल्ड होवार्थ दम्पत्ति, पूर्व मेयर, रोटरी क्लबाट १७ पदाधिकारी, स्थानीय स्कुलका शिक्षक, विद्यार्थी अनि गर्भनर लगायत नेपाललाई माया गर्ने बेलायती सहभागी थिए । सहभागीले नेपाली चिया, टिसर्ट, पश्मिना समेत किनेर आर्थिक सहयोग गरे ।

गुरुङले व्यक्तिगत रुपमा यसअघि एनआरएनए आइसीसीलाई एकहजार पाउण्ड र भूकम्प पीडित पत्रकारलाई ५० हजार रुपैयां दिइसकेका छन् । उनले व्यक्ति एक्लैले केही गर्न सम्भव नभएकाले पुननिर्माणमा सबैको उत्साहजनक सक्रियताको खांचो औंल्याए ।

सबै तस्विरहरुः मिलन तमु