लण्डनमा भेटियो २५ वर्षीय सन्दीप तामाङको शव, भेटिएनन शव बुझ्ने आफन्त

लण्डन। लण्डन महानगरीय प्रहरीले सन्दीप तामाङ नाम गरेको एक युवाको शव प्राप्त भएको तर उसको शव बुझ्न कोही पनि नआएको भन्दै आफन्त खोजिदिन अपील गरेको छ ।

लण्डनको हेज टाउन प्रहरीले तामाङको शव फेला पारेको तर शव बुझाउन कोही पनि फेला नपरेपछि लण्डनस्थित नेपाली दुताबासमा सम्पर्क गरेको थियो । तर त्यहाँबाट पनि तामाङको ठेगाना पत्ता नलागेकोले सर्वसाधारणलाई अपील गरेको बुझिएको छ ।

दुताबासकी उपनियोग प्रमुख रोशन खनालले प्रहरीले तामाङका बारेमा जानकारी दिन दुताबासमा सम्पर्क गरेको पुष्टी गर्नुभयो । तर तामाङको बारेमा थप विवरण र तस्वीर केही उपलब्ध नगराएकोले थप जानकारी दिन दुताबासले प्रहरीलाई पत्राचार गरेको खनालले बताउनुभयो ।

तामाङको जन्म मिति १८ जुलाई १९९९ दिइएको छ ।

तामाङका बारेमा कुनै जानकारी भए दुताबासमा दिन अनुरोध गरिएको छ भने एनआरएनए युकेका अध्यक्ष प्रेम गाहाले पनि जानकारीका लागि आह्वान गरेका छन् ।

यसअघि केही साता पूर्व मात्र लण्डन प्रहरीले नै सुरेश मगरको शव भेटिएको तर आफन्त पत्ता नलागेको भन्दै नेपाली दुताबाससित आफन्त पत्ता लगाउन अनुरोध गरेको थियो । बेलायतको नेपाली समुदायले मगरको पहिचान गरी आफन्तहरू प्रहरीको सम्पर्कमा पुगेका थिए । मगरको शव नेपाल लैजाने पहल हुँदै गरेको बुझिएको छ ।