बेलायतमा अझै घटेन ब्याजदर

लण्डन । बेलायतको केन्द्रीय बैँक बैँक अफ इङ्गल्याण्डले आधारभूत ब्याजदर यथावत राख्ने निर्णय गरेको छ ।

बिहीबार बसेको मौद्रिक समितिको बैठकले तेस्रोपटक आधारभूत ब्याजदर ५.२५ प्रतिशतमा राख्ने निर्णय गरेको हो ।

बैँकका गभर्नर आन्ड्रयू बेलीले अहिले नै ब्याजदर घटाउनु हतारो हुने बताएका छन् ।

बेलायतमा यस वर्षको अन्त्यसम्ममा मुद्रास्फिति २ प्रतिशतमा झार्ने सरकारको लक्ष्य रहेकोमा सो पूरा नभएको आँकलन गरिएको छ । गत अक्टोबरको तथ्याङ्कअनुसार बेलायतको मुद्रास्फिति ४ प्रतिशत रहेको थियो भने त्यसयताको तथ्याङ्क आउन बाँकी छ ।

विहीबार बसेको मौद्रिक समितिको बैठकमा तीन सदस्यले ब्याजदर बढाउनु पर्ने र बाँकी ६ सदस्यले यथावत कायम राख्नुपर्ने पक्षमा मत दिएका थिए ।

अमेरिका र युरोपको भन्दा उच्च मुद्रास्फितिको सामना गरिरहेको बेलायतमा अब अर्को वर्ष मात्र ब्याजदरमा कटौती हुने छ । तथापि बैँकहरूले भने पहिलेभन्दा कम ब्याजदरमा कर्जा दिन शुरु गरिसकेका छन् ।