कमला गुरुङको निधन ‘आन्तरिक रक्तस्राव’बाट

लण्डन । बेलायतमा अध्ययनका लागि आएको चार दिनमै निधन भएकी ३१ वर्षीय कमला गुरुङको मृत्यु आन्तरिक रक्तस्रावबाट भएको प्रारम्भिक अनुसन्धानमा देखिएको छ ।

उनको नजिकका आफन्तहरुको चिकित्सकसँगको भेटमा चिकित्सकले सो जानकारी दिइएको बताइएको छ । कमलाको जस्तो आकस्मिक मृत्यु महिलाहरूमा अति विरलै हुने र करिब १ लाख महिलामा एक जनालाई मात्र त्यस्तो समस्या हुने गरेको पनि बताइएको छ ।

गैरआवासीय नेपाली संघ (एनआरएनए) युकेका अध्यक्ष प्रेम गाहाले भने कमलाको निधनलाई चिकित्सकले ‘नेचुरेल डेथ’ बताएको जानकारी दिए ।   

डिसेम्बर ३ मा पेट दुखाई असह्य भएपछि उनलाई उपचारका लागि एम्बुलेन्समा हालेर रोयल बर्कसायर अस्पताल रेडिङमा लगिएकोमा उनको केही समयपछि नै निधन भएको घोषणा गरिएको थियो ।

डिसेम्बर ५ मा उनका श्रीमान निरज गुरुङ बेलायत आएपछि भोलिपल्ट कमलाको शव हेर्न र चिकित्सकसित भेट गर्न दिइएको थियो ।

अध्यक्ष गाहाका अनुसार अब कमलाको शव अस्पतालबाट रिलिज भएपछि उनको अन्तिम सँस्कार बेलायतमै गरिने छ । हालसम्मको सल्लाहअनुसार कोल्मा बहाकोट समाज युकेले कमलाको परिवारलाई सहयोगको संयोजन गर्ने र एनआरएनए युके, स्याङजा समाज युके र ग्रेटर रेडिङ नेपलिज सोसाइटीले सहयोग गर्ने तय भइसकेको छ ।