बेलायत अध्ययन गर्न आएको चार दिनमै कमला गुरुङको मृत्यु

लण्डन । उच्च शिक्षा अध्ययनका लागि बेलायत आएको चार दिनमै कमला गुरुङको मृत्यु भएको छ ।
स्याङ्जा विरुवा -४,ओरेष्टे स्थायी घर भएकी ३१ वर्षीय गुरुङ बेलायतको बीपीपी विश्वविद्यालयमा स्नातकोत्तर अध्ययनका लागि बिहीबार बेलायत आइपुगेकी थिइन् । शुक्रबार उनी विद्यालयमा पुगिन् ।
बेलायतको रेडिङमा बज्यै र काइँला बाबाको साथमा बस्दै आएकी उनले शनिबार रेडिङबाट विश्वविद्यालयसम्म कसरी आउने जाने भनेर रेल यात्राको योजनामा बिताइन् । आइतबार बिहान अचानक उनलाई पेट दुख्यो, बान्ता पनि होला, दिसा पनि होला जस्तो भयो । उनले यो कुरा बज्यै र काइँला बाबालाई पनि भनिन् । भर्खरै बेलायत आएकी उनलाई केही खानेकुरा पनि गडबड भयो कि हावापानी नमिलेर पो त्यसो भयो कि भनेर तातोपानी खान, आराम गर्न सल्लाह दिइयो । तर अझै च्याप्दै गएपछि करिब सवा ५ बजेतिर उनलाई एम्बुलेन्स बोलाएर रोयल बर्कसायर अस्पताल लगिएको थियो । सोही साँझ उनको निधन भएको खबर अस्पतालबाट दिइएको गुरुङका आफन्त विसन गुरुङले बताए ।
दुई दिदीबहिनी र एक भाइमध्येकी जेठी उनी गत फेब्रुअरीमा मात्र वैवाहिक बन्धनमा बाँधिएकी थिइन् । प्राविधिक गडबडीका कारण उनका श्रीमान् उनीसँगै बेलायत आउन पाएनन् । एनआरएनए युकेका अध्यक्ष प्रेम गाहामगरका अनुसार उनका श्रीमान् भोलि (मंगलबार) दिउँसो बेलायत आइपुग्दैछन् ।
गाहासित कमलाका श्रीमानले कमला यसअघि कहिल्यै बिरामी नभएको र कुनै गम्भीर स्वास्थ्य समस्या पनि नभएको बताएका छन् ।
कमलाका बाबा, आमा नेपालमै बसोबास गर्छन् भने बज्यै पेन्सनरका रुपमा रेडिङमा बस्दै आएकी छिन् । उनका काइँला बाबा केही समयअघि मात्र हङकङबाट बेलायत आएका हुन् ।
गाहाले कमलाको श्रीमान् बेलायत आएपछि उनलाई कस्तो किसिमको सहयोग र साथको जरुरत पर्छ सो गर्न आफू तत्पर रहेको बताएका छन् । साथै ग्रेटर रेडिङ नेपाली कम्युनिटी, स्याङ्जा समाज युकेसित परामर्श गरेर आवश्यक सबै सहयोग गर्ने पनि प्रतिवद्धता उनले जनाए ।
बेलायतमा यसअघि नेपाली विद्यार्थी सदीक्षा तामाङको पनि अचानक निधन भएको थियो ।