गीतकार बुद्धवीर लामा बेलायतमा सम्मानित

लण्डन । गीतकार बुद्धवीर लामा बेलायतमा नगदसहित सम्मानित भएका छन् ।
पूर्वधावकसमेत रहेका लामालाई नेपाली खेलकुद र सांगीतिक क्षेत्रमा पुर्याएको योगदानको कदर गर्दै इलाम समाज बेलायतले सम्मान गरेको हो ।
समाजका अध्यक्ष टेकवीर राईले लामालाई ४ हजार ४ सय ७ पाउन्ड (७ लाख ३५ हजार ३ सय ५२ रुपैयाँ) सहित प्रशंसापत्र प्रदान गरेका थिए ।
लामा गायनमा पनि रुचि राख्छन् ।
उनी बेलायत आएको अवसर पारेर बेलायतको अल्डरसटमा लामाको एकल सांगीतिक कार्यक्रम भएको थियो ।
इलाम सोसाइटी बेलायतले आयोजना गरेको सो कार्यक्रमबाट बचेको रकम लामालाई सम्मानस्वरुप प्रदान गरिएको हो ।
लामाले सम्मानवापत प्राप्त रकम नेपालका दुर्गम क्षेत्रका खेलाडीलाई सहयोग गर्ने र केही रकम अनाथलय, वृद्धाश्रम र अपाङ्ग केन्द्रलाई सहयोग गर्ने बताए । यसअघि उनले जुम्लाका धावकलाई टीसर्ट र खेल सामग्री सहयोग गरेका थिए ।
लामाले ताइवान र जापानमा सम्पन्न एसियाली भेट्रान्स एथलेटिक्स च्याम्पियनसिपको ५ हजार मिटर दौडमा क्रमशः छैटौं र दसौं स्थान हासिल गरेका थिए ।
चर्चित गीतहरुका सर्जक लामाले यसअघि १० वटा एकल साँगीतिक कार्यक्रम गरिसकेका छन् ।