एनआरएन युकेमा फुटको असर सदस्यतामा, खड्का समूहमा ४ हजार सदस्य

लण्डन । पाँच वर्षअघि विश्वकै सबैभन्दा धेरै सदस्य रहेको गैरआवासीय नेपाली संघ युकेमा संस्थाभित्रको विभाजनको गम्भीर असर सदस्य संख्यामा देखिएको छ ।
एनआरएनए अन्तर्राष्ट्रिय समितिबाट मान्यता पाएको समितिले आह्वान गरेको सदस्यता लिने अन्तिम मिति (२३ जुन मध्यरात) भित्र करिब ४ हजारले मात्र सदस्यता लिएका छन् । जुन बेलायतको कुल नेपालीको आधिकारिक जनसंख्याको करिब ४ प्रतिशत मात्र हो भने गत निर्वाचनमा सदस्यता लिएकाहरु सदस्यहरुको संख्याको करिब एक तिहाइ मात्र हो ।
स्मरण रहोस्, सन् २०२१ मा बेलायतमा सम्पन्न राष्ट्रिय जनगणनाले इङ्ल्याण्ड र वेल्स राज्यमा करिब १ लाख ४ हजार नेपाली रहेको देखाएको थियो । स्कटल्याण्डको भने हालसम्म तथ्यांक सार्वजनिक भइसकेको छैन ।
एनआरएन युकेको गत निर्वाचनमा करिब ११ हजार मतदाता रहेका थिए । त्यसअघि सन् २०१९ मा भएको निर्वाचनमा १३ हजार ६६९ मतदाता रहेका थिए । त्यतिबेला एनआरएनए युके विश्वभरिमै सबैभन्दा धेरै सदस्य भएको राष्ट्रिय समिति बनेको थियो ।
खड्का समूहले सार्वजनिक गरेको तथ्यांकअनुसार ४ हजार १३५ सदस्यको आवेदन स्वीकृत भएको छ भने २८७ जनाको आवेदन मुल्तवीमा राखिएको छ ।
खड्काले आफैँले भने ४ हजार सदस्य बन्नुलाई ‘संस्थाको पुनर्जन्म’ को दाबी गरेका छन् । उनले फेसबुकमा स्टाटस लेख्दै कार्यसमितिको सहयोग र बेलायतस्थित नेपाली समुदायले दिएको माया ममताले कोमामा रहेको गैरआवासीय नेपाली संघ युकेको पुनर्जन्म भएको बताएका छन् । संस्थामा पहिलो पटक लागू भएको ‘फेसभेरिफिकेशन सिस्टम’ सफल भएको उनको जिकिर छ ।
उता गत निर्वाचनबाट विजयी अध्यक्ष प्रेम गाहामगरको नेतृत्वमा रहेको एनआरएनए युके राष्ट्रिय समितिले भने अलग्गै सदस्यता आह्वान गरेको छ । निशुल्क सदस्यता दिने घोषणा गरेको सो समितिले आगामी जुलाई १५ सम्म सदस्यताका लागि आवेदन दिन सकिने बताएको छ ।